1,047 Бардыгы /

Жардам Кыргызстандын коопсуздук тармагына берилет. Мындан тышкары расмий Бээжин Кыргызстанга коронавируска каршы 5 млн. доза вакцина бермекчи. Бул тууралуу Кытайдын лидери Си Цзинпин менен Кыргызстандын президенти Садыр Жапаровдун 6-февралдагы жолугушуусунда маалым болду.

Мамлекет башчылары жолугушууда саясий, соода-экономикалык кызматташтыктын актуалдуу маселелерин жана келечегин, биргелешкен ири долбоорлорду каржылоону талкуулашты.

Си Цзинпин Садыр Жапаровдун кыргыз-кытай кызматташтыгын өнүктүрүүгө кошкон салымын жогору баалап, эки мамлекеттин дипломатиялык мамилеси түзүлгөндөн берки убакта ар тараптуу стратегиялык өнөктөштүк өскөнүн белгиледи. Ал ошондой эле Садыр Жапаровдун жетекчилиги астында Кыргызстанда ири саясий жана экономикалык реформалар болуп, коррупцияга каршы катуу күрөш жүрүп жатканын белгиледи.

“Кытай Кыргызстан үчүн ишенимдүү дос жана коңшу болуп келген жана болуп кала берет, эки элдин жыргалчылыгы үчүн байланыштар мындан ары да чыңдаларына ишенем”, — деди Цзинпин.

Кытайдын лидери мындан тышкары Кыргызстандан экологиялык таза азыктарды сатып алууга жана энергетика жаатында кызматташууга даярдыгын билдирди. Ошондой эле пандемиялык чектөөлөрдү эске алуу менен аба каттамдарын акырындап калыбына келтирүү жана жүк ташууну көбөйтүү зарылдыгын белгиледи. “Торугарт” жана “Эркечтам” өткөрмө пункттарынын өткөрүү мүмкүнчүлүгүн кеңейтүү тууралуу да сөз кылды.

Си Цзинпин “Кытай-Кыргызстан-Өзбекстан” темир жолун куруунун жана үч өлкөнүн кызматташтыгын күчөтүү зарылдыгын айтып, бул жалпы Борбор Азия үчүн маанилүү экенин белгиледи.

Өз кезегинде президент Садыр Жапаров Кыргызстан менен Кытайдын дипломатиялык мамилесине 30, эки өлкөнүн “ынак коңшулаштык, достук жана кызматташтык макулдашуусунун” 20 жылдыгына туш келген бул жолугушуунун өзгөчөлүгүн айтты.

Садыр Жапаров бул сүйлөшүүлөр кыргыз-кытай ар тараптуу стратегиялык өнөктөштүк мамилесинин мындан аркы өнүгүүсүнө жаңы дем берип, жетишилген макулдашуулар жакынкы жылдарда өз ара аракеттенүүгө негиз болоруна ишенимин билдирди.

Президент “Кытай-Кыргызстан-Өзбекстан” темир жол долбоорун ишке ашырууга кыргыз тарап да кызыкдар экенин билдирди. “Торугарт” жана “Эркечтам” бекеттери аркылуу жүк жана унаа өткөрүү маселесине токтолуп, кыргыз-кытай чек арасы аркылуу товарлардын импортун жана экспортун тоскоолдуксуз жүргүзүү үчүн “жашыл коридорлордун” натыйжалуулугун жогорулатуу боюнча иштерди улантуу зарылдыгын белгиледи.

Ошону менен катар ал кыргыз тарап мамлекеттик-жеке өнөктөштүктүн негизинде кытайлык компаниялар менен биргеликте ишке ашырууга кызыкдар болгон бир катар долбоорлорду сунуштады. Алар:

• Энергетика тармагындагы кызматташууну активдештирүү;.
• Экономиканы өнүктүрүү үчүн 1 млрд. долларлык капиталга ээ кыргыз-кытай инвестициялык фондун түзүү.

Мындан тышкары Жапаров Кытай өкмөтү тарабынан Кыргызстанда социалдык-экономикалык долбоорлорду ишке ашыруу үчүн үзгүлтүксүз көрсөтүлүп жаткан гранттык жардамга ыраазычылыгын билдирди. Эки өлкөнүн ортосунда үзгүлтүксүз аба каттамдарын жандандыруунун маанисин белгиледи.

Аягында Садыр Жапаров Си Цзинпинди Кыргызстанга мамлекеттик сапар менен келүүгө чакырды.

Жапаров Бээжинге 4-февралда расмий сапар менен барган.

WWW.