1,410 Бардыгы /

БАТКЕН. Айдаркен чек ара отрядынын чек арачылары мамлекеттик чек ара аркылуу маңзат  алып өтүүгө аракеттенген Өзбекстандын жаранын кармашты.  Бул туурасында Кыргыз Республикасынын Улуттук коопсуздук мамлекеттик комитетинин Чек ара кызматынын маалымат жана коммуникация башкармалыгынан билдиришти.

 Маалыматка караганда,УКМКнын Чек ара кызматынын чек ара кезмети кызмат өтөө маалында Кыргызстандан Өзбекстанды көздөй мамлекеттик чек арага жакындап бара жаткан жаранды байкап калышкан жана анын мамлекеттик чек арадан мыйзамсыз кесип өтүү аракетине бөгөт коюу максатында чек арачылар чек ара бузуучусун дароо кармашкан. Колуна кармаган баштыкчасы (пакет) бар экен. Текшерүү учурунда баштыкчанын ичинен өзгөчө жыты бар өсүмдүк заты, болжолдуу түрдө гашиш маңзаты табылды. Мунун жалпы салмагы 2 кило 500 граммды түзгөн. Окуянын чоо-жайын тактоонун жүрүшүндө кармалган кылмышка шектүү Өзбекстан Республикасынын 1995-жылы туулган А.А.у. аттуу жараны экендиги биротоло тастыкталды .

       Тиешелүү документтер толтурулгандан кийин кармалган жаран жана маң  заттар мындан ары кошумча иликтөө иштерин жүргүзүү максатында жергиликтүү тиешелүү компетенттүү органдардын кызматкерлерине өткөрүлүп берилди.

Алишер ТОКСОНБАЕВ, өз кабарчы