1,581 Бардыгы /

         ОШ. Ош облусунун Ноокат районундагы Арал айылын аралап агып өтүүчү Кыргыз-Ата дарыясынын булганышына түздөн-түз себепкер “Мрамор-Стоун” ЖЧКсына – ишканасына 517 миң өлчөмүндө айып пул салынды. Бул жөнүндө Ноокат районунун акими Данир Иманалиев ачыктады.

• Экология жана климат боюнча мамлекеттик комитетинин Ош

аймактык башкармалыгы тарабынан бул ишканага (“Мрамор-Стоун” ЖЧКсына) 517 миң сом айып пул салынды. Кетирилген кемчиликтерге көңүл кош мамиле кылып, аны дегеле жойбогондугу үчүн А.Мирмахмудов атындагы Айыл Өкмөтүнүн башчысынын милдетин аткаруучу Д. Ажибековго сөгүш, ал эми Ноокат райондук мамлекеттик акимчилигинин экологиялык коопсуздукту көзөмөлдөө боюнча куратору Кубанычбек Орозмаматуулуна эскертүү дагы берилди, – деп кошумчалады Ноокат районунун акими Данир Иманалиев.

         Мамлекеттик экологиялык жана техникалык инспекциясы Ноокат жергесиндеги айтылуу Кыргыз-Ата дарыясына бир катар лабораториялык изилдөөлөрдү жүргүзгөн. Мунун негизинде өзөндөгү суунун булганышына Арал айылында иштеп жаткан таш кесүүчү ишканадан (“Мрамор-Стоун” ЖЧКсынан) чыккан саркындылар олуттуу себеп болгондугу биротоло аныкталды. Ошондуктан, жергиликтүү тургундар президенттин Ош облусундагы ыйгарым укуктуу Өкүлүнө таш кесүүчү ишкананын ишмердүүлүгүнө нааразы болуп кайрылышып, а түгүл токтоосуз чара көрүүнү дагы суранышкан эле.

Алишер ТОКСОНБАЕВ, өз кабарчы