2,400 Бардыгы /

ОШ. Ош шаарында аялзатын талап-тоноп кеткен 32 жаштагы шектүү акыры кармалды. Бул жөнүндө Ош ШИИБсынын басма сөз кызматынан билдиришти.

Маалыматка караганда, Ош шаардык ички иштер башкармалыгына ушул жылдын 19-мартында Ош шаарынын тургуну – аял киши арыз менен атайын кайрылган. Анда ал өзү жашаган көп кабаттуу үйдүн алдында болжол менен саат 23:00 чамасында белгисиз атуул аны колколоп муунтуп, колундагы сумкасын жана «Редми 7А» үлгүсүндөгү уюлдук телефонун тартып алгандыгын билдирген. Бул факты Кылмыштардын бирдиктүү ресстирине ЖКнин 206-беренеси менен катталып, шектүүгө дароо эле издөө жарыяланган.

Ошентип, ыкчам иштеринин натыйжасында ушул жылдын 6-апрелинде аталган кылмышка шектүү катары Ош облусунун Өзгөн районунун 1990-жылы туулган К.Б. аттуу тургуну изин суута электе кармалып, убактылуу кармоочу жайга киргизилди. Кармалган жигит ушул жылдын январь айынан бери бир нече жолу аялдарга кол салуу фактысына тиешеси бар экендиги дагы аныкталды. Эки жолу соттолгон шектүү мурда жасаган кылмышы үчүн пробациялык мөөнөтүн өтөп жаткан маалы экен.

Алишер ТОКСОНБАЕВ, өз кабарчы