984 Бардыгы /

          ТАШКЕНТ. АКШнын Эл аралык өнүктүрүү агенттигинин (USAIDдин) түздөн-түз колдоосу аркасында Кыргызстандын он айыл чарба ишканасы Ташкент шаарында өткөн UzFood-2022 Эл аралык азык-түлүк көргөзмөсүнө катышышты. Мында Кыргыз компаниялары Өзбекстандын соода түйүндөрү жана тамак-аш жана суусундуктар менен алектенишкен ишканаларын кыдырышты.  Кыргыз ишканалары мөмө-жемиштерди, эт жана сүт азыктарын Өзбекстанга экспорттоо жаатында  20 чакты келишимге кол коюшту. Эң ири келишимдер 1,7 миң тонна алма жана 100 тонна жаңгак жана мисте экспорттоо боюнча түзүлдү.

Кыргыз делегациясынын курамына «Бай-Дыйкан», «Ишкер KG», «Келечек» кооперативдери, ошондой эле «Обид Файз» ЖЧКсы, «Ала-Бука Кыргыз-Эт» ЖЧКсы, «Абил» логистикалык борбору, ЖИ Якубжон Алимжанов, ЖИ Алмазбек Суранов, ЖК Дуулатов, ЖИ Суранов Алмазбек жана ЖИ Хадия ишканалары киришти. Саналган ишканалар Ош жана Жалал-Абад облустарынын айыл чарба азыктарын: алма, кара өрүк, мисте, жаңгак жана жаңгак майын, ошондой эле эт жана сүт азыктарын, шире жана суусундуктарды байма-бай тартуулашты.

• Бул биздин ишкерлер үчүн Өзбекстандык өнөктөштөр менен

бетме-бет жолугушууга, бизнес-идеяларды алмашууга, агрардык секторду өнүктүрүүнүн алдыңкы бизнес тенденциялары, тамак-аш өндүрүшү, ошондой эле технологиялар жана инновациялар менен таанышууга жакшы мүмкүнчүлүк түздү, – деди кургатылган мөмө-жемиштерди кайра иштеткен ЖИ Дуулатов ишканасынын өкүлү Салтанат ЭРБАЕВА.

UzFood – Борбор Азиядагы эң ири тамак-аш көргөзмөлөрүнүн бири. Өткөн жылы көргөзмөгө алдыңкы тамак-аш ишканаларынын, импортерлордун жана дистрибьюторлордун 4 миңден ашык өкүлдөрү катышкан.

• Жаңы рынокторго чыгуу – Кыргызстанда бизнести кеңейтүүнүн

жана жумуш орундарын түзүүгө гана өбөлгө түзөт. Бул өнүгүүнүн, жаңы жумуш орундарын түзүүнүн жана кыргызстандыктардын кирешесин көбөйтүүнүн эң жакшы жана дагы болочоктуу жолу. Андыктан, USAID ишкерлерге Өзбекстан сыяктуу коңшу өлкөлөр менен бизнес байланыштарын чыңдоого жардам берүүнү улантат, – деди Эндрю Мэйбрук, USAIDдин Кыргыз Республикасындагы башчысынын милдетин аткаруучусу. 

Аталган ишкердүүлүк сапары Өзбекстан менен аймактык жана чек ара соодасынын өсүшүнө алып келүүчү кошумча нарк чынжырчасын чыңдоо аркылуу жумушчу орундарын түзүүгө жана кыргызстандык фермерлердин, ошондой эле агробизнестердин кирешелерин ого бетер жогорулатууга багытталган USAIDдин «Агросоода» долбоорунун алкагында уюштурулду.

Алишер ТОКСОНБАЕВ, өз кабарчы