1,113 Бардыгы /

Казакстандын Улуттук коопсуздук комитетинин (УКК) мурдагы башчысы Карим Масимовдун камактагы мөөнөтү 6-майга чейин узартылды. Бул тууралуу жергиликтүү басылмалар кабарлады.

Маалыматка караганда, Масимовдон тышкары УКК башчысынын мурдагы орун басарлары Ануар Садыкулов (6-майга чейин) менен Даулет Ергожин (8-майга чейин) да камакта калды.

Кезинде эки жолу Казакстан өкмөтүнүн башчысы болуп иштеген 56 жаштагы Масимов “Мамлекетке чыккынчылык кылуу” айыбы менен 8-январда кармалган. 6-январда ал УКК төрагасы кызматынан алынганы кабарланган. Кийинчерээк ага “Бийликти күч менен басып алуу” жана “Кызмат абалын кыянат пайдалануу” беренелери боюнча айыптар тагылганы белгилүү болгон. Анда Масимов менен бирге анын эки орун басары да кармалган. Мындан тышкары мурдагы президент Нурсултан Назарбаевдин иниси, УКК төрагасынын биринчи орун басары Самат Абиш алгач “эмгек өргүүсүнө чыгып”, кийин кызматынан алынган.

Апта башында Масимовду колдоо үчүн ачылган онлайн-ресурс анын абалы начарлап кеткенин жазды.

10-мартта Казакстан УККсы Масимовго жабык келишим аркылуу чет мамлекеттин өкүлдөрүнөн эки миллион доллар пара алуу айыбы тагылганын билдирген. Мекеменин маалыматына ылайык, экс-чиновник премьер-министр болуп турганда бизнес-түзүмдөрдүн биринен 2,5 миллиард теңге турган элиталык конок үйүн жана жер тилкесин алган.

Карим Масимов өлкөнүн туңгуч президенти Нурсултан Назарбаевдин көп жылдан берки санаалашы катары айтылып жүргөн. Ал атайын кызматтын башына 2016-жылы келген. Ага чейин, 2007-2012-жылдары жана 2014-2016-жылдары өкмөттү жетектеген.

WWW.