1,194 Бардыгы /

Тажикстанда “Душанбе” телеканалынын 24 жаштагы кызматкери Шохрухи Исмоилди күч менен армияга алып кетишти. Бул тууралуу анын жакындары билдиришти.

Маалыматка караганда, журналистти милиция кызматкерлери 12-апрелде Душанбедеги “Ватан” кинотеатрынын жанынан кармап кетишкен. Бул учурду автоунаа айдоочуларынын бири видеого тартып алып, социалдык түйүндөргө жарыялаган. Анда жарандык кийимчен үч киши журналистти күч менен унаага отургузуп жатканын көрүүгө болот. Бул видео социалдык түйүн колдонуучуларынын арасында кызуу талкуу жаратып, алар Тажикстанда өспүрүмдөрдү “күчтөп аскерге алып кетүү” тажрыйбасы токтобогонун сынга алууда.

Коргоо министрлигинин басма сөз катчысы Фаридун Махмадализода быйыл аскер курагындагы жарандарды “күч менен армияга алып кетүү” боюнча эч кандай арыздануу болбогонун билдирди.

“Исмоил буга чейин аскердик комиссариаттын бир канча жолку чакыруусун көңүлгө алган эмес. Мындан улам комиссариаттын кызматкерлери милицияга кайрылууга аргасыз болушкан”, – деди басма сөз катчы.

Ал “Аскердик кызмат тууралуу” мыйзамга ылайык, жаран армияга баруудан баш тарткан учурда укук коргоо органдары аны кармап, аскердик комиссариаттарга жеткирүүгө милдеттүү экенин кошумчалады.

Бирок Исмоилдин жакындары Коргоо министрлигинин бул билдирүүсү менен макул эмес. “Иним армияга барууга жараксыз. Биз анын саламаттыгын жакшылап текшерүү өтүнүчү менен Аскердик прокуратурага арыз жаздык. Эгер ал аскерден качып жүргөн болсо эмнеге мурда эле өзү жашаган Рудаки районунда кармашкан эмес?”, – деп суроо салды Шохрухинин агасы Абдулло Исмоили.

Тажикстанда жазгы аскерге чакыруу өнөктүгү башталган эки жумадан бери социалдык түйүндөрдө жарандык кийимчен адамдар өспүрүмдөрдү кармап, күч менен автоунаага отургузуп жатканы тартылган бир нече видео жарыяланды.

Тажикстанда жазгы аскерге чакыруу өнөктүгү 1-апрелде башталып, майдын аягына чейин созулат. Өлкөдө жыл сайын өспүрүмдөрдү “армияга күч менен алып кетүү” көрүнүштөрүнө даттангандар көп болот. Бийлик мындай билдирүүлөрдү дайыма четке кагып, алар армияга өз каалоолору менен кетип жатканын билдирип келет.

WWW.