2,265 Бардыгы /

Душанбенин Исмоили Сомони райондук соту ММА мушкери жана блогер Чоршанбе Чоршанбиевди 8 жыл 6 айга эркинен ажыратты.

Интернет аркылуу конституциялык түзүмдү күч менен өзгөртүүгө чакырык жасоого күнөөлүү деп табылган Чоршанбиев сотто өкүм менен макул эмес экенин билдирди.

Буга чейин мамлекеттик айыптоо соттон ММА мушкерин 10 жылга эркинен ажыратууну өтүнгөнү кабарланган.

Тоолуу Бадахшандан чыккан Чоршанбе Чоршанбиев акыркы жылдары Орусияда жашап жүргөн жана 2016-жылдан тарта таймаштын аралаш түрлөрүнө катыша баштаган. Ал 2021-жылы 3-декабрда Москва шаарында унаасын катуу айдап, жол эрежесин бузганы үчүн кармалган. Белгилүү спортчуга сот айып пул салып, 3-декабрга караган түнү Орусиядан депортациялаган. Аны Душанбе аэропортунда тажик атайын кызматынын өкүлдөрү кармап кетишкен.

4-декабрда Душанбенин Шохмансур райондук прокуратурасы Чоршанбиевге каршы “Раса, улут, аймак жана дин аралык кастыкты козутуу” жана “Конституциялык түзүлүштү күч менен кулатууга ачык чакырык жасоо” беренелери менен кылмыш иши козголгонун кабарлаган. Тергөөнүн жүрүшүндө андан биринчи берене боюнча тагылган айыптар алынган.

25-ноябрда Хорогдо 29 жаштагы Гүлбиддин Зиебековдун өлтүрүлүшүнө байланыштуу нааразылык акциялары башталган. Күч түзүм кызматкерлери аны кармоо учурунда жок кылышкан. Жердешинин күнөөсүз экенине ишенген бадахшандыктар анын сөөгүн шаардык администрациянын имаратына алып келип, күнөөлүүлөрдү жазалоону талап кылышкан; митинг бир нече күнгө созулган.

Орусияда жашаган Чоршанбиев четте калбай, Тажикстан элине жана памирликтерге видеокайрылуу жолдогон.

“Мен саясатчы эмесмин, мен оппозиционер эмесмин, мен адилетсиздикке байкоо салган жана ага көз жумбаган кишимин. Мен бүт дүйнөгө, бирок өзгөчө Тажикстан элине кайрылам. Канчага чейин чыдайсыңар, канчага чейин көз жумасыңар? Үч күндөн бери абалга байкоо салып жатам, бүт эл колдоп жатканына таң калдым. Менимче, бул окуяга чоң резонанс берүү керек. Адилетсиздикке, күнөөсүз адамдардын өлүмүнө каршы чыгууга чакырам”, — деген Чоршанбиев.

Кийин ММА мушкеринин дал ушул кайрылуусу кылмыш ишин козгоого негиз болгон.

WWW.