1,572 Бардыгы /

ЖАЛАЛ-АБАД. Жалал-Абад облусунун Сузак районундагы Жоомарт Бөкөнбаев атындагы мектептин окуучусуна кол көтөргөн ушул эле билим журтунун мугалими акыры өзү жумуштан кетүү тууралуу арызын жазды. Анын арызы дароо эле канааттандырылгандыгын аталган мектептин  директору Даткайым Нуралиева ырастады.

– Мугалим өзү үстүбүздөгү жылдын 8-июнунда эмгек өргүүсүнө чыккан эле. Ал өргүү аяктагандан кийин иштен кетүү тууралуу арызын дагы кошо жазды. Биз бул мыйзамдуу талапты илгиртпестен канааттандырдык, – деп кошумчалады Жалал-Абад облусунун Сузак районундагы Жоомарт Бөкөнбаев атындагы мектебинин директору Даткайым Нуралиева.

Айтмакчы, социалдык тармакка сабак маалында мугалим окуучу кызды кадимкидей урушуп, а түгүл уруп дагы жаткан видеосу тараган. Андыктан Жалал-Абад облустук милициясы дагы жеринде бул өңүттө катуу иштеп жаткандыгын ачыктаган. Кийинчерээк мектеп директору кол көтөргөн мугалим иштен алынаарын  айткан жайы бар. Ал эми Билим берүү жана илим министрлиги Сузак райондук билим берүү башкармалыгы тарабынан комиссия түзүп, бул жосунсуз жорукту кенен-чонон териштиришээрин катуу убадалаган.

Ошентип комиссия чечимин чыгарып, буга ылайык, мугалимди иштен кетирүү буйругу жокко чыгарылган. Кийин кыздын үй-бүлөсү жана анын жашоо-шарты тууралуу «Адилет» укук коргоо уюму дагы өзүнчө маалымат жайылткан.

Алишер ТОКСОНБАЕВ, өз кабарчы