1,953 Бардыгы /

          ЖАЛАЛ-АБАД. Жалал-Абад облусуна караштуу Таш-Көмүр — Кызыл-Жар-12 унаажолуна асфальт төшөөдө «Кыргыз автожол» ишканасынын кызматкерлери 29 миллион сом кымырып алгандыгы акыры ашкереленди. Ошондуктан, Таш-Көмүр шаардык прокуратурасы кылмыш ишин козгоп, тергеп жаткан чагы. Бул туурасында Башкы прокуратуранын маалымат кызматынан кабарлашты.

          Маалыматка караганда, Таш-Көмүр шаардык прокуратурасы аталган жолго быйыл жаңыдан төшөлгөн асфальттын сапаттуулугун дыкаат текшерген. Мунун жыйынтыгында Транспорт жана коммуникациялар министрлигине караштуу «Кыргыз автожол» мамлекеттик ишканасынын №38-жол тейлөө мекемеси жол куруу ченемдерин жана эрежелерин одоно түрдө бузгандыгы тастыкталды. Ошентип, асфальт бетон катмарынын тыгыздык коэффициенти сакталган эмес, ал эми калыңдыгы нормадагыдан жука төшөлгөн. Ошого карабастан сапатсыз салынган жолду Жол-транспорт департаментинин кызмат адамдары акт менен кабыл алышкандыгы аныкталды. Натыйжада мамлекетке 29 миллион 104 миң 829 сом зыян келтирилген.

          Ошентип, аталган фактынын негизинде Таш-Көмүр шаарынын прокуратурасы тарабынан Кылмыш-Жаза Кодексинин 337 («Кызмат абалынан кыянаттык менен пайдалануу») жана 273-беренеси («Сапаты начар курулуш») менен кылмыш иши козголду. Ушул тапта тергөө аракеттери абдын кызуу жүрүп жаткан чагы.

          Алишер ТОКСОНБАЕВ, өз кабарчы