810 Бардыгы /

ОШ. Кыргызстандын Түштүк башкалаасында кадимкидей кеңсе ачып, Европа өлкөлөрүнө жумушка жөнөтүүнү катуу убада кылган киши ири алдамчылыкка шектелип кармалды. Бул туурасында Ош шаардык милициясынан билдиришти. Мекеменин маалыматына караганда, Ош облусунун Кызыл-Кыштак айылынын 28 жаштагы тургуну Бишкекте жашынып жүргөн жеринен кармалып, Ош шаарына алып келинип,  милициянын убактылуу кармоочу жайына киргизилди.

Шектелүчүү Польшага жана Германияга жөнөтүп, ошол жактан жумуш таап берем деген убада менен 150дөн ашуун адамды алдап кеткендиги, алардын көбү виза ачтыруу үчүн 900-1800 евродон төлөп беришкендиги аныкталды. Чет жакка жумушка орноштурууга лицензия берүү менен алектенүүчү Жарандарды чет өлкөгө ишке орноштуруу борборунун маалыматына караганда, уруксатсыз иштеп жаткан агенттиктер боюнча былтыр милицияга 35, быйыл алгачкы үч айда эле 28 материал жөнөтүлгөн.

Баса, Эл аралык валюта фондунун маалыматына караганда, Кыргызстанда соңку үч жылдан бери жумушсуздук деңгээли 9 пайызды чапчыды. Иш издешип, сырт жактарга байма-бай чыгып жатышкандардын басымдуулугу – жаштар. Булардын арасында түрдүү жеке агенттиктерге алданышып, мыйзамсыз миграцияга, андан ары кулчулукка кабылгандар дагы толтура.

Алишер ТОКСОНБАЕВ, өз кабарчы