1,440 Бардыгы /

БАТКЕН. Президент Садыр Жапаровдун жарлыгына ылайык, Талас облусундагы ыйгарым укуктуу өкүлүнүн биринчи орун басары Канимет Осмонбеков ээлеген кызматынан бошотулуп, Баткен облусуна караштуу Лейлек районунун акими болуп дайындалды.

Канимет Осмонбеков 2018-жылдын февраль айынан тартып Президенттин Талас облусундагы ыйгарым укуктуу өкүлүнүн биринчи орун басары кызматын абийирдүү аркалап келаткан эле.

Баса, Канимет Осмонбеков 1971-жылы 13-апрелде Талас облусунун Бакай-Ата районуна караштуу Боо-Терек айылында туулган. Үй-бүлөлүү. Эки уул, бир кыздын атасы. К. Скрябин атындагы айыл чарба институтун аяктаган. Кийинчерээк Президенттин алдындагы Башкаруу Академиясын дагы бүтүргөн.

Ал эми Лейлек районунун буга чейинки акими Алмазбек Рахманкулов эмне себептен кызматынын бошотулгандыгы туурасында расмий маалымат бериле элек. Баса, өткөн айда «Алдамчылыкка» айыпталып соттолгон Икрамжан Илмияновго «Лейлек районунун ардактуу атуулу» наамы ыйгарылган жана бул талаш калк арасында абдан кызуу талкуу жараткан. Ошол маалда социалдык тармактарда акимдин иштен кетишин талап кылгандар дагы болгон.

Улуттук коопсуздук комитети (УКМК) Алмазбек Атамбаевдин жеке айдоочусу, ишенимдүү кеңешчиси катары таанылган, президенттик администрациянын аппарат жетекчисинин мурдагы орун басары Икрамжан Илмияновду 2018-жылы октябрда кармаган. Башкы прокуратура ага «Жеке компаниялардын биринен 150 миң доллар акча алган» деген айып таккан.  Ал Кылмыш-Жаза Кодексинин «Өзгөчө ири өлчөмдө жасалган алдамчылык» беренесинин негизинде күнөөлүү деп табылган жана 2019-жылы октябрда Бишкектин Октябрь райондук соту жети жылга кесип, 1600 эсептик көрсөткүчтө (160 миң сомдой) айып салуу, үй-мүлкүн конфискациялоо тууралуу өкүм чыгарган.

Бирок, бул кылмыш ишин 2020-жылы июнда Бишкек шаардык соту карап, анын жаза мөөнөтүн бир жыл алты айга кыскартып, жазаны 5,5 жыл деп чегерген. Жогорку сот өкүмдү күчүндө калтырган. Күнөөсү жок экендигин айтып келаткан Илмиянов Молдовановка айылындагы №26 жатак абакка чыгарылган.

Алишер ТОКСОНБАЕВ, өз кабарчы