27 Бардыгы /

Жалаң жайыт жерди өзүнө гана менчиктештирип алган «Кадастр» мамлекеттик ишканасынын жетекчисине кылмыш иши козголду. Бул туурасында Башкы прокуратурадан кабарлашты.

Маалыматка караганда, Жалал-Абад облусунун прокуратурасы тыкыр текшерүү жүргүзгөндө, Жер ресурстары, кадастр, геодезия жана картография боюнча мамлекеттик агенттигинин Аксы филиалынын жетекчиси жайыт жерди өзүнүн жеке менчигине алгандыгы аныкталды. Такталгандай, Аксы районунун Кашка-Суу айыл өкмөтүнүн токтому менен 2 гектар жайыт жер аянты жеке менчикке бекитилип берилген. Т.М. «Кадастр» мамлекеттик мекемесинин Аксы филиалынын жетектеп туруп кызмат абалынан кыянаттык менен пайдаланып, 2022-жылы аталган жер аянтты мүлккө болгон укуктардын бирдиктүү мамлекеттик реестрине каттоого алып, өзүнүн наамына Мамлекеттик Акт даярдаткан.

Аталган факты боюнча прокуратура тарабынан Кылмыш-Жаза Кодексине ылайык кылмыш иши козголду. Тергөө жүргүзүү үчүн иш УКМКнын Жалал-Абад облусундагы башкы башкармалыгына өткөрүлүп берилди.

Алишер ТОКСОНБАЕВ, өз кабарчы