879 Бардыгы /

БАТКЕН. Кыргыз Республикасынын Улуттук коопсуздук мамлекеттик комитетинин Чек ара кызматынын маалымат жана коммуникациялар башкармалыгы үстүбүздөгү жылдын 24-26 декабрь күндөрү Баткен облусунун Лейлек районунда мамлекеттик чек ара аркылуу жүктөрдү аткезчилик жол менен алып өтүүгө аракет кылынган бир нече фактыларга дароо бөгөт коюлгандыгын маалымдайт.

       Мисалы, ушуш жылдын 26-декабрында Кыргыз Республикасынын Ички Иштер Министрлигине караштуу Ички Аскерлигинин аскер кызматкерлери чек арачылар менен биргеликте аткезчилике бөгөт коюу иш-чараларынын алкагында Баткен облусунун Лейлек районуна караштуу Ак-Сарай жерлигинде кызмат өтөө учурунда Кыргызстандын 1995-жылы туулган У.А., аттуу жарандын башкаруусунда Мерседец-Бенц Спринтер үлгүсүндөгү автоунаасын кармашкан. Транспорт каражатын токтотуу үчүн КР ИИМдин Ички Аскерлигинин аскер кызматкерлери курал колдонгону, тактап айтканда эскертүү иретинде асманга үч жолу ок атышкан. Транспорт каражатын текшерүү учурунда 20 түрмөк тигүү үчүн кездеме материалдары аныкталган жана бул жүктөргө айдоочунун колунда тиешелүү документтери болгон эмес.  Алдын-ала алынган маалыматтарга караганда жүктү Тажикистандын аймагына алып өтүшмөкчү экен.

       Ал эми 24-декабрь Баткен облусунун Лейлек районуна караштуу Катта-Туз – Арка автоунаа жолунун аймагындагы Ак-Сарай жерлигинде Лейлек чек ара отрядынын чек арачылары Кыргызстандын жарандарынын башкаруусунда Мерседец-Бенц Спринтер үлгүсүндөгү үч автоунаасын дагы кармашты. Автоунааларды текшерүүгө алуу учурунда жүктөргө тиешелүү документтери жок 230 рулон тигүү үчүн кездеме материалдары жана 4 боолонуп оролгон кийим-кечелер аныкталды. Айдоочулардын айтуусу боюнча бул жүктөрдү алар Тажикистандын аймагына алып өтүшмөкчү болушкан. Алдын-ала алынган маалыматтардын негизинде, бул кармалган жүктөрдүн жалпы суммасы 1 500 000 сомдон ашуун сумманы түзүп олтурат.

        Ошентип, тиешелүү иш кагаздар толтурулгандан кийин, айдоочулар жана жүктөр мындан ары териштирүү иштерин жүргүзүү үчүн компетентүү органдын кызматкерлерине дароо эле өткөрүлүп берилди.

Алишер ТОКСОНБАЕВ, өз кабарчы