1,935 Бардыгы /

Ала -Бука районунун Добул Шабданов атындагы райондук балдардын мектептен тышкаркы билим берүү борборунда Президенттин жарлыгына ылайык быйылкы “2022-жыл- Тоолордун экосистемасын коргоо жана климаттык туруктуулук” жылынын алкагында бир топ алгылыктуу иштер алып барылууда.

Ала-Бука райондук балдардын мектептен тышкаркы билим берүү борборунда ар тараптуу чыгармачыл, таланттуу, билимге, өнөргө өзгөчө кызыгуу менен билим алып жаткан окуучулар менен иш алып барылат. Борбор өз кесибин сүйгөн, кесипкөй мугалимдер менен камсыздалган. Жыл ичинде райондо, областта, республикада өткөрүлүп жаткан ар түрдүү маданий иш-чараларга биздин борбордун окуучулары эң жогорку деңгээлде катышып, жакшы көрсөткүчтөргө ээ болуудабыз. Атап айтсам биздин борбордо “Грация” бий ийримин жетектеп жаткан ийрим жетекчибиз Умида Косимованын окуучулары жыл сайын республикалык деңгээлде өткөрүлүп жаткан кароо-сынактарга катышып 1- орунга ээ болушууда. Быйылкы 2022-2023-окуу жылына карата уюштурулган “Мелодия осени” аталыштагы сынактан үч бийи 1- орунга ээ болушту. Ал эми 2022-жылдын  4-декабрь күнү Бишкек шаарында өткөрүлгөн “Жылдыздуу асман” эл аралык конкурстан Казакстандан келген окуучулар менен таймашып, 1-2-3- орундарга татыктуу болушту. Ал эми республикалык деңгээлде өткөрүлгөн “Өлкөнүн күчү-элимдин ынтымагында” темасындагы сүрөт конкурстан биздин окуучуларыбыз областтан 1- орунга жетишишти.

Биздин мектептен тышкаркы билим берүү борборлорунун негизги максаты:  Балдардын  бош убактыларын туура пайдалануу, кесипке багыт алуу, билимин өркүндөтүү, талантын эл алдына алып чыгуу, кылмыштуулуктун алдын алуу менен ар тараптуу чыгармачыл инсандардын калыптануусуна көмөк көрсөтүү максатта иш алып барат.

З. САЛИЕВА, Д. Шабданов атындагы балдардын мектептен тышкаркы билим берүү борборунун окуу бөлүмүнүн башчысы, Ала-Бука району