2,655 Бардыгы /

          ОШ. “Казак” каймана аты менен калкка кеңири белгилүү уюшкан кылмыштуу топтун мүчөсү акыры кармалды. Бул туурасында Ички иштер башкармалыгынын басма сөз кызматынан билдиришти.

          Маалыматка караганда, Ош шаарынан Ички иштер министрлигинин Кылмыш иликтөө башкы башкармалыгынын түштүк аймагы боюнча башкармалыгынын кызматкерлери “Казак” каймана аты менен таанымал  уюшкан кылмыштуу топтун мүчөсүн кармашты. 2022-жылдын 11-ноябрына караган түнү Ош шаарындагы караоке-клубдардын биринде бир нече адам эки жигитти бычак менен коркутушуп, сабашып, андан соң кылмыш болгон жерден изин жашырып кетип калышкан. Жабырлануучулар милицияга арыз менен кайрылышкан. Ошентип, бул фактынин негизинде Кылмыш-Жаза Кодексинин 280-беренесинин (Бейбаштык) негизинде кылмыш иши козголгон.

          Мурда бир нече жолу соттолгон жана криминалдык чөйрөдө “Казак” каймана аты менен таанымал 41 жаштагы жаран өзүнүн шериги 37 жаштагы Б.С. менен Ош шаарынын аймагынан кармалышты. Кармалган жарандар Ош ШИИБдин убактылуу кармоочу жайына киргизилди. Азыркы учурда жогорудагы кылмыш ишине тиешеси бар башка жарандарды аныктоо боюнча тиешелүү чаралар көрүлүүдө.

          Алишер ТОКСОНБАЕВ, өз кабарчы