1,063 Бардыгы /

ЖАЛАЛ-АБАД. Бүгүн, 23-декабрында К.Ш. Токтомаматов атындагы Эл аралык университетте (ЭАУ, Жалал-Абад ш.) окуу жайдын ректору, э.и.д., проф., Аймактык Менеджмент академиясынын академиги Сатыбалды Ашимович Өмүрзаковдун 60-жылдык маарекесине карата “Ааламдашуу жараянынын көйгөйлөрү жана өнүгүү келечеги – коомдун биримдигин ийгиликтүү калыптандыруунун жана өнүктүрүүнүн негизи катары” аттуу эл аралык илимий-практикалык конференция өткөрүлдү.

ЭАУнун Кесиптик багыт берүү жана коомчулук менен байланыштар кызматы билдиргендей, конференция гибриддик түрдө өткөрүлдү: онлайн жана офлайн тартиптеринде. Конференцияга Кыргызстандан, Казакстандан, Өзбекстандан, Түркиядан, Польшадан жана Россиядан 228 илимпоз, изденүүчү, ар кайсы тармактардан адистер, бир катар уюм-мекемелердин, эл аралык уюмдардын өкүлдөрү катышты. Конференциянын иши бир катар илимий багыттарды, тармактарды жана ааламдашуу жараянында коомдук өнүгүүнүн маанилүү маселелерин камтыган  6 секцияда жүргүзүлдү. Мындан сырткары, конференцияга Кыргыз кооперативдер биримдигинин төрагасы Ж.М. Абакиров, Кыргыз Республикасынын Жалал-Абад областындагы ыйгарым укуктуу өкүлү А.Т. Сыргабаев, Жалал-Абад шаарынын мэри Э.А. Ормоков, Түрк тилдүү мамлекеттерди изилдеген “Түрк дүйнөсү” фондунун президенти проф. Көзхан Язган, өлкөнүн бир катар жогорку окуу жайларынын ректорлору чакырылган. Конференциянын башталышында меймандар ЭАУнун ректору, э.и.д., проф., АМА акад. С.А. Өмүрзаковго куттуктоолорун айтышты. Пленардык отурумда э.и.д., проф. Дырка Стефан (Польшанын Жогорку Силезия экономикалык университети),э.и.д., проф. Мехмет Юже (Азербайжан Мамлекеттик экономикалык университети), э.и.д., проф. В.Л. Назарова жана PhD, проф. А.М. Даузова (Алматы Гуманитардык-экономикалык университети), м.и.д., проф. М.Р. Ниязметов (Ташкент Медициналык академиясы), PhD, доц. О.Т. Нурматов (Фергана Политехникалык университети) илимий баяндамаларды жасашты. Жалпысынан айтканда, конференция абдан мазмундуу болуп, айтылган темасы боюнча көптөгөн илимий жана колдонмо материалдар топтолду. Алар окуу жайдын “К.Ш.Токтомаматов атындагы Эл аралык университеттин жарчысы”  аттуу илимий-популярдык журналында жарык көрүшөт. Катышуучулардын айтуусунда конференция жогорку деңгээлде уюштурулган.