1,677 Бардыгы /

ОШ. Ош облусунда жайланышкан Кара-Суу районунун Баш-Булак айылындагы мектеп дээрлик мындан 62 жыл мурун курулган. Ушул тапта билим уясынын дубалдарынан жарака кетип балдарга кооптуулук жаралууда. Агарту умекемеси 480 орунга ылайыкташкан мектепте 1 620 бала окуп жатат.

          Бул туурасындагы ачыктаган Жогорку Кеңештин депутаты Алишер Козуев жаңы мектеп салууга мамлекеттен каражат бөлүнбөй жаткандыгына тызылдады. Анын айтымында, ушул тапта мындагы окуучулар үч нөөмөт менен бир класста 40-50дөн тыгылып отуруп окушат экен. Баса, бул мектеп 1961-жылы салынган. 2008 жана 2015-жылдардагы жер титирөөдө дубалдарынан жарака кеткен. Кыргыз жана орус тилдүү мектеп болгондуктан муктаждык аябай көп. Муну 2024-жылкы бюджетке киргизип, жок дегенде кошумча корпус болсо дагы башташ керек. Шаардан алыс, шарты катаал айылда болгондуктан,  бул мектепке тез арада көңүл буруу зарыл!

          Ошентип, аталган Насыр Примбердиев атындагы орто мектептин директору Гүлайым Ташиева балдарды окутуу кооптуу болуп калгандыгын танган жок: – Мектептин пайдубалы акырындап чөгүп жатканы байкалып жатат. Сырттан өткөн ным мектептин ичиндеги дубалдарга таасир этип, тынымсыз үбөлөнүп турат. Полдорунун кээ бир жерлери чирип ыңгайсыздык жаратууда. Кээ бир класстардын шыбынан тамчы өтүп бузула баштады.

          Кара-Суу районунун Баш-Булак айылындагы Насыр Примбердиев атындагы орто мектептин директору Гүлайым Ташиева ошондой эле ал жаңы мектеп куруп берүү өтүнүчү менен бийлик органдарына үч жылдан бери тынымсыз кайрылып келе жатышкандыгын дагы баса белгиледи. Бирок, жыйынтык жок!

          Алишер ТОКСОНБАЕВ, өз кабарчы