1,833 Бардыгы /

ЖАЛАЛ-АБАД. Кечээ, 2-октябрда Жалал-Абад шаардык ички иштер бөлүмү тарабынан №5 мектепте мугалимдер күнүнө карата майрамдык иш-чара уюштурулду.

Жалал-Абад ОИИБдин басма сөз кызматы билдиргендей, майрамдык саамалыкка ОИИБдин коомдук коопсуздук кызматынын башчысы Алмазбек Жусупов, Жалал-Абад ОИИБдин тергөө кызматынын башчысы Канатбек Аскарбеков, Жалал-Абад ШИИБдин башчысы Мирлан Батыров, Жалал-Абад шаардык билим берүү бөлүмүнүн башчысы Ырысбек Калчаев, шаардагы мектептердин директорлору, алардын орун басарлары, социалдык педогогдор катышышты.

Иш-чара учурунда майрам ээлерине куттуктоо сөздөр айтылып, милиция тарабынан даярдалган баалуу белектер тапшырылды. Билим берүү тармагынын кызматкерлери Жалал-Абад ОИИБдин, Жалал-Абад ШИИБдин ардак грамоталары, дубал сааттары менен сыйланышты. Ошондой эле мектеп окуучуларына билим берүүдө талыкпастан эмгектенип, келечектин мыкты адистерин даярдоодо, кылмыш жана түрдүү кырсыктардын алдын алууда милиция менен тыгыз кызматташуу сөздөрү айтылды.

Өз кезегинде Жалал-Абад шаардык билим берүү бөлүмүнүн башчысы Ырысбек Калчаев уюштуруучуларга куттуктап, сыйлык тапшырып жаткандыгына ыраазычылык билдирип, жаш өспүрүмдөр арасындагы кылмыштуулуктун алдын алууда биргелешип иштөөгө даяр экендигин белгиледи.

Соӊунда катышуучуларга мектеп окуучулары тарабынан даярдалган сахналаштырылган көрүнүштөр көрсөтүлүп, ыр жана бийлер жаӊырды.