6 Бардыгы /

“Алтын сертификатка” ээ болгон жана алдыңкы бүтүрүүчүлөргө жалпы 400 миң сом акча каражаты бөлүндү.

Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев 2024–2025-окуу жылынын жыйынтыгы менен жалпы республикалык тестирлөөдө “Алтын сертификатка” ээ болгон төрт, жогорку балды камсыздаган эки, 2025-жылдын апрель айында өткөн республикалык олимпиадада алдыңкы орундарды камсыздаган эки бүтүрүүчү, алардын мугалимдери жана ата-энелерин куттуктады.

Өз сөзүндө облус башчысы Тилек Текебаев бүтүрүүчүлөрдүн ийгилиги жалпы облустун сыймыгы экенин белгиледи.

“Быйылкы бүтүрүүчүлөрдүн жетишкен ийгилиги Жалал-Абад облусу үчүн чоң сыймык жаратты. Сиздер көрсөткөн жыйынтыктар облусубузду өлкө боюнча Бишкек шаарынан кийинки 2-орунга чыгарды. Бул – окуучулардын эмгеги, мугалимдер менен ата-энелердин тыгыз кызматташтыгынын жыйынтыгы десек болот. Бүгүнкү билимдүү, ой жүгүртүүсү кең, жоопкерчиликтүү жаштар — эртеңки өлкөнүн келечегин түзгөн инсандар. Сиздердин араңыздардан келечекте мыкты кесип ээлери, өлкөбүздүн өнүгүшүнө салым кошкон чыгаан уул-кыздар чыгаарына ишенем!”–деди Тилек Текебаев.

Сыйлоо аземинде бүтүрүүчүлөргө жана мугалимдер ыйгарым укуктуу өкүлдүн резервдик фондунан бөлүнгөн жалпы 400 миң сом акча каражаты жана Ардак грамоталар тапшырылды.