1,221 Бардыгы /

ЖАЛАЛ-АБАД. Бүгүн, 17-декабрда К.Ш, Токтомаматов атындагы Эл аралык университетте (ЭАУ, Жалал-Абад ш.) профессор Таштан Бөрүбаевич Бөрүбаевдин 75-жылдык маарекесин салтанаттуу түрдө белгилешип, маарекелик иш-чаралардын алкагында “Педагогика, санариптештирүү жана жаңы маалыматтык технологиялар” атуу чөлкөмдүк илимий-практикалык конференция өткөрүштү.

ЭАУнун Кесиптик билим берүү жана коомчулук менен байланыштар кызматынын маалыматына ылайык, маарекелик иш-чараларга жана аталган чөлкөмдүк илимий-практикалык конференцияга ЭАУнун профессор-окутуучулар курамы менен биргеликте Кыргыз Республикасынын түштүк чөлкөмүндөгү бир катар жогорку окуу жайлардын, уюм-мекемелердин өкүлдөрү катышты, алардын ичинде ЖАМУ, ОшМУ, КӨУ, ОМПИ, ОшТУ, БатМУ, ЗЭАУ, РМСУнун Оштогу филиалы. Профессор Т.Б. Бөрүбаев өлкөбүздүн педагогика илиминин, жумуриятыбыздын түштүк чөлкөмүндө жогорку билим берүү тутумунун өнүгүүсүнө  зор салымын кошкон, эмгек сиңирге ишмер, илимпоз, педагог инсан катары таанымал. Ал 50 жылдай эмгек жолун жогорку кесиптик билим берүү тармагына арнап, анын ичинде 20 жыл ОшМУда, 28 жыл ЭАУда иштеп келген.