1,503 Бардыгы /

ЖАЛАЛ-АБАД. Облуста иш кагаздары кыргыз тилинде 96 пайыз жүргүзүлүп жаткандыгы “Мамлекеттик тил саясаты жана улуттук нарк” аталышындагы жыйында айтылды.

Иш-чарага Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиясынын төрагасы Каныбек Осмоналиев, Президенттин Жалал-Абад облусундагы ыйгарым укуктуу өкүлү Абсаттар Сыргабаев, район акимдери, шаар мэрлери, билим берүү мекемелеринин, айыл аймактардын, мекеме-ишканалардын жетекчилери, коомдук ишмерлер жана жаштар катышты.Жыйында буга чейин өткөрүлгөн текшерүүлөрдүн жыйынтыгы менен Жалал-Абад облусунда 96 пайыз иш кагаздар мамлекеттик тилде жүргүзүлүп жатканы маалымдалды. Мамлекеттик тил жана тил саясаты боюнча улуттук комиссиясынын төрагасы Каныбек Осмоналиев белгилегендей, облус боюнча башка аймактарга салыштырмалуу кыргыз тилин жайылтуу көрсөткүчтөрү алдыда. Бирок текшерүүлөрдө анын сабаттуу жүргүзүлүүсүндө кемчиликтер аныкталганын айтты. Президент Садыр Жапаров “Улуттук нарк жөнүндө” жарлыкка кол койгонун, анын алкагында программа иштелип жатканын билдирди. Анда мамлекеттик тилге жана тарыхый баалуулуктарга өзгөчө көңүл бурууну эске алуу сунушталганын кошумчалады.

Облус башчысы өз сөзүндө тил – улуттун байлыгы экенин, анын өнүгүүсүнө мамлекеттик кызматкерлер, ар бир жаран салым кошуусу керектигин айтып, орун алган кемчиликтерди жоюу үстүндө иш жүрө турганын белгиледи.

Азыркы учурда мамлекеттик тилдин колдонуу чөйрөсүн кеңейтүү үчүн жаңы технологияларга кошумча кыргыз тилин орнотуу программасы иштелип жатат. Аны “УЛУТ Софт” компания аткарууда. Жолугушуунун алкагында мамлекеттик мекеме-ишканаларга жүргүзүлгөн текшерүүлөрдүн жыйынтыгы менен бир катар кызматкерлерге Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиясынын ардак грамоталары тапшырылды.