2,562 Бардыгы /

ЖАЛАЛ-АБАД. Ноокен районунун Ноокен айыл өкмөтүндө “Ноокен –Тазалык” муниципалдык мекемеси уюшулуп, айыл аймактарындагы турмуш тиричиликтеринен чыккан калдыктарды атайын таштанды полигонуна чогултуп, утилизация иштери өз нугунда журуп жатат.

“Ноокен –Тазалык” ишкананы түзүү долбоору эл аралык уюмдардын колдоосу менен айыл аймактарын ар тараптуу өнүктүрүү максатында жергиликтүү бийлик менен биргеликте пландаштыруунун негизинде 2021-жылдын май айында башталып, 2022-жылдын май айынан тартып толук ишке ашырылды. Бул долбоордун аткарылышында райондук өнүктүрүү фондусу таштандыларды жыйнап, аларды утилизация жумуштары менен айылдык конуштарга таштанды таштоочу контейнерлерди жайгаштыруу белгиленген болсо, “Абад” коомдук фондусу аркылуу Lovol TE 354 маркасындагы трактор өзү жүктөгүчү жана самосвал чиркегичи менен жаңы техника алынып ишке берилди.

“Буга чейин Ноокен айыл өкмөтүндө тазалык ишканасы жок болгондуктан таштандыларды көчө бойлоруна, айылдын ортосунан аккан Чертек-Сай суусунун жээктерине жана Шалка сайынын боюна, бир сөз менен айтканда көрүнгөн жерге төгүп келишкен эле. Ал таштандылардын арасынан малдардын, ит, мышыктардын өлүктөрү да чыгып, сасып ирип экологиялык терс көрүнүштөр бул жакта турсун, эпидемиялык жугуштуу оорулар чыгып кетеби деп кооптонгон учурларыбыз да болгон. Аймактагы мекеме-ишканалар болсо таштандыларын өрттөп, калдыктарын жерге көмүп, күн ысыган учурда алар коңурсуп сасып ыңгайсыз жыт каптаган учурлар да болуп калат эле. Ар бир жумуштун өз убакты сааты бар дегендей, мына быйыл көйгөй жаратып келген таштанды маселеси да чечилип, быйылкы жылдын май айынан бери өз ишмердүүлүгүн көрсөтүп жатат”, -дейт тазалык ишканасын түзүүдөгү зарылчылык жөнүндө жумушчу топтун өкүлү Кыяз Паязов.

Жаңыдан уюшулган “Ноокен-Тазалык” ишканасынын жамааты төрт адамдан турат. Бир жетектөөчү адис, бир тракторист, эки жумушчу жалпы айыл аймагы боюнча иш алып барат.

Долбоор “Абад” коомдук фондусу аркылуу “Жергиликтүү экономиканы биргеликте пландаштыруу жана өнүктүрүү” долбоорунун алкагында аткарылып, (GIZ) Германия эл аралак кызматташтык коомунун “Аймактарды комплекстүү өнүктүрүү” программасынын негизинде Европа Биримдиги жана Германиянын Экономикалык кызматташтык жана өнүктүрүү федералдык министрлигинин каржылоосу менен ишке ашырылды.

Белгилей кетсек, Ноокен айыл аймагынын жалпы аянты 5893 га жерди түзөт. 2500 кожолук жашаган жети айылда 18300 калк жашайт. Мындан тышкары айыл аймакта 18 мамлекеттик ишканалар жана 13 коммерциялык ишканалар бар.

Узакбай МАМАТКУЛОВ, Ноокен району