1,839 Бардыгы /

ЖАЛАЛ-АБАД. Кечээ, 18-августта Жалал-Абад шаарынын Спутник кичи районунда Т.Байзаков атындагы эс алуу паркы ачылды.

Парктын ачылуу аземине шаар мэри Эрнисбек Ормоков, Жогорку кеңештин депутаты Айбек Маткеримов, Президенттин Жалал-Абад облусундагы ыйгарым укуктуу өкүлүнүн орун басары Эркин Маматаев, шаардык кеңештин төрагасы Нуртилек Орозбаев баштаган депутаттар, мекеме-ишканалардын жетекчилери жана шаар тургундары катышты.

Шаар мэри кароосуз калып, таштанды баскан аймак көптөгөн эмгектин арты менен заманбап эс алуу паркына айланганын баса белгилеп, шаар тургундарына жана келген коноктор үчүн баардык ыңгайлуу шарттар түзүлгөнүн кошумчалады.

Парктын ачылуу аземинде сүрөт көргөзмөсү, гүлдөр жарманкеси өтүп, келген коноктор паркка көчөт тигишти. Аталган парк 8 гектардан ашуун аянтты түзөт. Анда оргумалар, веложол, балдар ойноочу аянт, спорттук жана маданий иш-чаралар өтүүчү аймактар камтылган. Мындан сырткары парктын жаныдагы Победа көчөсүнө асфальт төшөлүп, 100дөн ашуун унаага ылайыкташкан унаа токтотуучу жай, велосипед коюучу жай курулган.

Парктын курулушуна жергиликтүү бюджеттен 40 млн. сомдон ашык каражат жумшалды. Парк реконструкция болгонго чейин “Нооруз” паркы деп аталып, көп жылдар бою кароосуз калган. Паркты кайрадан куруунун алкагында уруксаты жок курулган 7 тосмо жана 8 имараттын курулушу буздурулган.