1,557 Бардыгы /

ЖАЛАЛ-АБАД.  Жалал-Абад ШИИБдин балдар иштери боюнча инспекторлору ЖАМУнун колледжинин жана К.Ш.Токтомаматов атындагы Эл аралык университетинин студенттери менен жолугушуп, кылмыштуулуктун алдын алуу багытында түшүндүрүү иштерин жүргүзүштү.

Жалал-Абад ОИИБдин басма сөз кызматы билдиргендей, жолугушууда тоноо, уурулук, топтошуп мушташуу, эрте турмуш куруу, рекетчилик сыяктуу терс көрүнүштөрдөн алыс болу керектиги эскертилди. Жаңыдан колледждерге тапшырган студенттерге татыктуу билим алуу жана спорт менен алектенүүгө көңүл буруулары айтылды. Студенттер менен болгон жолугушууда милиция тарабынан бир катар социалдык видеороликтер көрсөтүлдү.

К.Ш.Токтомаматов атындагы Эл аралык университетинин тарбия иштери боюнча проректору А.Жолдошбаев өз сөзүндө жолугушуунун темасы абдан маанилүү жана актуалдуу экендигин баса белгиледи. Студенттерди коомдук тартипти сактоого, жарандардын укугун сыйлоого жана милиция менен булл багытта активдүү кызматташууга чакырды.

Мындан сырткары Жалал-Абад милициясы тарабынан жаңы окуу жылы башталганына карабастан мектепке барбай жүргөн окуучуларды аныктоо иштери жүргүзүлүп жатат.

Белгилей кетсек, Жалал-Абад шаарында 50 миңден ашуун өспүрүм болсо, анын15 миңден ашууну студенттер. Шаар аймагында 20 мамлекеттик мектеп, 10 жеке мектеп жана 4 жогорку окуу жайы бар.