837 Бардыгы /

ЖАЛАЛ-АБАД. Бүгүн 13-сентябрда Президент Садыр Жапаровдун элдин укук коргоо органдарынын ишмердүүлүгүнө байланышкан маселелеринен кабар алуу тапшырмасынын алкагында Тогуз-Торо районунун эли менен Башкы прокурор Курманкул Зулушев, Министрлер Кабинетинин Төрагасынын биринчи орун басары Адылбек Касымалиев, ИИМдин кылмыш иликтөө башкы башкармалыгынын начальниги Оролбек Акпаров, ИИМдин Тергөө кызматынын начальниги Альтаир Исмаилов, Президенттин Жалал-Абад облусундагы ыйгарым укуктуу өкүлү Абсаттар Сыргабаев Тогуз-Торо районунун эли менен жолугушту.

Жалал-Абад ОИИБдин басма сөз кызматы билдиргендей, жолугушууга Жалал-Абад облусунун жана Тогуз-Торо районунун тиешелүү жетекчилери, жергиликтүү тургундардан 400дөй адам катышты. Тогуз-Торо районунун акими Мирлан Карагулов, Жалал-Абад ОИИБдин жана Тогуз-Торо РИИБдин жетекчилиги да жыйында болду.

Жергиликтүү тургундар жогорку бийлик өкүлдөрүнө көбүнчө социалдык маселелер боюнча кайрылышты. Район аймагында кыш заводдун жоктугу, бышык кышты башка аймактардан алып келүүгө баарынын эле каржылык мүмкүнчүлүгү жетпей тургандыгы белгиленди. Милиция тарабынан токтотулган кылмыш иштерин көзөмөлдөп коюу жана сот иштерине байланыштуу суроолор айтылды. Мындан сырткары мектеп, бала бакча, спорт залдар, оорукана, суу каналдары, ички жолдорго байланыштуу жана башка бир топ маселелер көтөрүлдү.

Буга чейин 6-15-июль күндөрү Жалал-Абад облусунун башка район жана шаарларында эл менен жолугушуулар өткөрүлгөн. Ал эми Тогуз-Торо районундагы жолугушуу жолдун ыңгайына жараша Нарын облусу менен катарлаш болуп өттү.