1,035 Бардыгы /

          БАТКЕН. Баткен облусуна караштуу Баткен районунун акими Учкунбек Жоробаев баштаган өкүлдөр Өзбекстандын Сох районунун жетекчиси Сайидбахром Саидмусаев жетектеген топ менен бейтарап Боз-Адыр жана Шархабад айылдары чектешкен тилкеде гана жолугушту.

Ошентип, тараптар чек ара аймактарында мындан ары чыр-чатактардын жана кылмыштуулуктун алдын алуу, а түгүл таптакыр болтурбоо, өз ара алаканы ого бетер күчөтүүнү катуу макулдашышты. Айрым турмуштук чыр-чатактарды дароо эле жөнгө салуу, жайыт, ошондой эле сууга байланышкан көйгөйлөрдү ыкчам жайгаруу, окуяны ого бетер ырбатпоону дагы ачык сүйлөшүштү.

Баса, Кыргызстандын аймагында Өзбекстанга караштуу Сох району жана Тажикстандын Ворух анклавы жайгашкан. Ушул жылдын 14-17-сентябрында Кыргыз-Тажик чек арасындагы куралдуу кагылышууда Баткен облусунан 140 миңден ашуун адам коопсуз жакка жер которушкан. Анан дагы Баткен-Халмион-Кадамжай жолу аткыланып жатканына байланыштуу Өзбекстан элди Сох анклавы аркылуу өтүүчү жолдор менен эвакуациялоого дагы уруксат берген. Чек арада кан төгүлгөн окуяны Кыргызстандын Тышкы иштер министрлиги “Тажикстандын алдын ала пландаган куралдуу агрессиясы” деп атаган. Тажикстан дагы күнөөнү Кыргызстанга гана төңкөргөн.

Ал эми 20-cентябрда Садыр Жапаров Нью-Йоркто Бириккен Улуттар Уюмунун Башкы ассамблеясынын 77-сессиясында сөз сүйлөп, ондогон адамдын өмүрүн алган окуяны “Масштабдуу аскердик кагылышуу” деп атап, Тажикстанды “Бардык макулдашууларга карабастан Кыргызстанга чабуул жасады” деп айыптаган. Ушундан көп өтпөй Тажикстандын тышкы иштер министри Сирожиддин Мухриддин дагы Бириккен Улуттар Уюмунун Башкы ассамблеясында сөз сүйлөп, айыптоолорду таптакыр четке каккан.

Айтмакчы, Кыргызстан бул куралдуу кагылыштан 63 жаранынан айрылды. Булардын кыркы – аскер кызматкери. Жараат алгандардын расмий эсеби 200гө чукулдады. Ал эми Тажикстандын Тышкы иштер министрлиги чек арада 41 жараны каза тапкандыгын, 200гө чукулу жараат алгандыгын шардана кылган.

Алишер ТОКСОНБАЕВ, өз кабарчы