1,089 Бардыгы /

САЛАМАТТЫК САКТОО МИНИСТРИ ГҮЛНАРА БААТЫРОВА ОШ ШААРЫН КЫДЫРУУДА

ОШ. Кыргыз Республикасынын саламаттыкты сактоо министри Гүлнара Баатырова иш сапары менен Ош шаарын кыдырды. Мунун алкагында Ош шаардык клиникалык ооруканасынын балдардын жугуштуу оорулар стационарына баш багып, медицина кызматкерлери менен ачык-айкын жолугушуп, алардын иштөө шарттары менен жоринде таанышты.

Белгилей кетчү жагдай: аталган жайга Ош облустар аралык бириккен клиникалык аймактык ооруканасынын жугуштуу оорулар бөлүмдөрүнүн бейтаптары жана медицина кызматкерлери которулган. Жакын арада мында лаборатория, параклиника, кир жуучу жай, тамактануу пункту, кампа, амбулаториялык диагностикалык бөлүм ачуу, ошондой эле жаңы имаратка жылытуу жана желдетүү системаларын орнотуу пландаштырылууда. Ушуга улай бул мекеменин макамын өзгөртүү маселеси дагы кенен-чонон талкууланды.

Андан ары С.Данияров атындагы Кыргыз мамлекеттик медициналык кайра даярдоо жана квалификацияны жогорулатуу институтунун Түштүк филиалынын жана шаардык перинаталдык борбордун кошумча имараттарын ээлеген «Клиника Ош» медициналык клиникасынын ишмердүүлүгү менен кеңири таанышты. Ушул тапта аталган имараттарга Ош шаардык ооруканасынын кардиология жана терапия бөлүмдөрүн, жаңы төрөлгөн балдардын патологиясы бөлүмүн убактылуу жайгаштыруу маселеси дагы каралууда.

Соңунда Кыргыз Өкмөтүнүн мүчөсү Гүлнара Баатырова мурунку Ош шаардык ооруканасынын аймагында жайланышкан соттук-медициналык экспертиза борборуна дагшы баш бакты. Өз ара талкууланган маселелер министр тарабынан кеңири каралып, андан соң гана чечим кабыл алынмакчы.

Алишер ТОКСОНБАЕВ, өз кабарчы