1,545 Бардыгы /

ОШ. Кыргызстандын Түштүк башкалаасында «Креативдүү технологиялардын кербени» эл аралык фестивалы 12-октябрда өз ишин баштады. Бул иш-чара эми 15-октябрда гана аяктайт.  

«Креативдүү технологиялардын кербени» эл аралык фестивалына  Кыргызстан, Казакстан, Орусия, Беларусь, Армения жана Өзбекстандан 300дөн ашуун таланттар катышып жатышат. Аталган иш-чара педагогикалык коомчулуктун, билим берүү тармактарынын, жаш студенттердин көңүлүн окуу жараянында жана практикада кревтивдүү технологияларды иштеп чыгууга жана киргизүүгө буруу максатында гана өткөрүлүүдө. Ачылыш аземи Султан Ибраимов атындагы Ош улуттук драма театрынын жанындагы аянтчада өткөрүлүп, анда мугалимдер үчүн панелдик талкуулар, мастер-класстар жана башка иш-чаралар уюштурулду.

Ошондой эле иш-чаранын жүрүшүндө кол өнөрчүлөрдүн эмгектеринин көргөзмөлөрү, улуттук тамак-аштардын жарманкелери дагы жүрүүдө. Эл аралык фестиваль бул сапар Академик Муса Адышев атындагы Ош технологиялык университетинин, Ош мамлекеттик педагогикалык университетинин, Султан Ибраимов атындагы Ош облустук улуттук драма театрынын, Алымбек-Датка этнографиялык комплексинин аянтчаларында жүрүп жаткан чагы.

Ошентип, аталган дүйнөлүк фестиваль Кыргыз Республикасынын Билим берүү жана илим министрлиги менен «Алтын түйүн”» Улуттук балдар инженердик-техникалык Академиясы менен биргеликте уюштурулууда.

Алишер ТОКСОНБАЕВ, өз кабарчы