1,035 Бардыгы /

Соцтармактарда «Компаньон», «Дос-Кредобанк» жана «Бакай банк» коммерциялык банктары орусиялык «Мир» төлөм системасынын карталарын тейлөөнү токтоткону жөнүндө маалымат пайда болду.

«Азаттыктын» кабарчысы банктардын колл-борборлору менен байланышканда, алар «Мир» төлөм карталарын тейлөөнү токтотушканын тастыкташты.

«Дос-Кредобанк» бир катар орусиялык банктар менен кызматташууну токтотуу жөнүндө чечим 17-октябрда кабыл алганын кабарлады. «Тилекке каршы, бул чечимдин себеби бизге белгисиз»,- деп белгилешти банктан.

Бул арада «Компаньон» банкы «Мир» карталарынын колдонуучуларын тейлөөнү 4-октябрда эле токтоткону белгилүү болду. Каржы мекемесинин колдоо кызматы мунун себебин түшүндүргөн жок, болгону чечимди жетекчилик кабыл алганын белгиледи.

«2022-жылдын 4-октябрынан тартып биз бир катар орус банктары: «Сбербанк», «Альфа банк», «Газпромбанк», «Совкомбанк» жана калган 20 банк менен кызматташууну токтоттук»,- деп белгиледи «Компаньон».

«Бакай банктын» колдоо кызматы орусиялык бардык каржы мекемелери менен кызматташууну токтотконун белгиледи. «Бүгүнкү күндөн баштап биз бардык орусиялык банктар менен кызматташууну токтоттук. Себебин түшүндүрө албайм. Бул биздин ички саясат, – деди белгиледи банктын өкүлү.

Улуттук банктын расмий өкүлү Аида Карабаева «Азаттыкка» ар бир банк өз алдынча чечим кабыл аларын айтты.

«Мен буга комментарий бере албайм. Биз эч кандай көрсөтмө берген эмеспиз, бул алардын коммерциялык ишмердүүлүгү »,- деди ал.

21-сентябрда Казакстандын Улуттук банкы да Орусиянын төлөм системасынын “Мир” карталарын тейлөө өлкөдөгү банкоматтарда убактылуу токтотуларын кабарлаган. 19-сентябрда Түркиянын ири финансылык мекемелери – Isbank жана Denizbank банктарында да орусиялык аталган карта иштебей калган.

WWW.