1,071 Бардыгы /

          ОШ. Ош шаарынын борбордук аянтында жаңыдан сатылып алып келинген 50 автобусду расмий тапшыруу иш-чарасы өткөрүлдү. Буга Ош шаарынын мэри Алмаз Мамбетов, Ош шаардык Кеңешинин төрагасы Салман Назылбеков, «Өзбек-Кыргыз» өнүктүрүү фондунун төрагасы Азиз Аалиев, «СамАвто» автозаводунун Орто Азия өлкөлөрүнө экспорттоо тобунун башчысы Азиз Нишанбаев, автобустардын айдоочулары жана дагы шаар тургундары катышышты.

Ош шаарынын мэри Алмаз Мамбетов коомдук траснпорт тармагындагы көйгөйлөрдү чечүү багытында мэрия мындай абдан натыйжалуу иштерди дагы улантаарын убадалады.

– Шаардагы коомдук транспорт тармагындагы көйгөйлөрдү чечүү боюнча Ош шаарынын мэриясы ички жана тышкы инвесторлор менен ыңгайлуу шарттардагы долбоорлорду ишке ашыруу жаатында тиешелүү жумуштарды такай жүргүзүп келет. «Өзбек-Кыргыз» өнүктүрүү фонду менен алып барылган жумуштардын натыйжасында шаарыбызга Өзбекстан Республикасынын Самарканд шаарындагы «СамАвто» автозаводунун өндүрүшүндөгү ISUZU SAZ HC40 үлгүсүндөгү 50 бирдик автобус сатып алынып келинди. Бул автобустар күйүүчү майды аз сарптагандыгы, техникалык мүнөздөмөсүнүн жөнөкөйлүгү жана баасы дагы жөндүү болгондугунан улам, биздин шаарыбыз үчүн ыңгайлуу болууда. Жаңы алынып келинген автобустар шаардыктардын суроо талаптарын эске алуу менен, эң керектүү болуп жаткан аймактарга, атайын комиссиянын иликтөөсүнүн жыйынтыгынын негизинде төрт муниципалдык каттамдарга бөлүштүрүлдү, – деди Ош калаасынын башчысы Алмаз Мамбетов,

Белгилей кетчү жагдай: аталган автобустардын баасы 37 миң доллардан бааланган. Ар бири 38 жүргүнчүгө ылайыкташкан. Эки күн аралагында бул автобустар линияга чыгарылат. Ал үчүн шаардын төмөнкү аймактарына 4 жаңы шаардык маршруттук линиялар иштелип чыкты: Жапалак айыл аймагы, Туран жана Амир-Тимур муниципалдык аймактык башкармалыктары. Жаңы коомдук транспортторго дагы «BUS Service» мобилдик тиркемеси орнотулуп, жүргүнчүлөр жол жүрүүсүн алдын ала пландоосуна шарт жаратылды. Автобустардын жол акысы накталай төлөм учурунда 10 сом, накталай эмес электрондук төлөм жүргүзсө 8 сом деп белгиленди.

Алишер ТОКСОНБАЕВ, өз кабарчы