591 Бардыгы /

ЖАЛАЛ-АБАД. Бүгүн 17-ноябрда Жалал-Абад ОИИБдин Экстремизмге жана мыйзамсыз миграцияга каршы аракеттенүү кызматынын (ЭММКАК) кызматкерлери чет элдик студенттер менен жолугушуп, түшүндүрүү иштерин жүргүзүштү.

Жалал-АбадОИИБдин басма сөз кызматы билдиргендей, жолугушуу учурунда буга чейин Бишкек шаарында болгон чет элдик жарандар арасындагы массалык мушташ тууралуу сөз болгон. Бул сыяктуу ызы-чууларга бөгөт коюу, социалдык тармактарды колдонууда туура эмес маалыматтарды жайылтпоо зарылдыгы белгиленди. Диний-экстремисттик маанидеги чакырыктарды, тыюу салынган диний агымдардын иш-аракеттерин билбестиктен бөлүшүп алуудан сак болуу керектиги эскертилди.

ЭММКАК кызматкерлери чет элдик студенттерди Кыргыз Республикасынын мыйзамдарын үйрөнүүгө жана мыйзамдуулуктуу сактоого чакырышты. Облус аймагында кайсы өлкөнүн жараны болбосун тутунган динине, расасына, улутуна карабастан ынтымакта болуу керектигин эскертишти. Ошондой эле аларга өлкө аймагында тыюу салынган диний агымдар тууралуу маалыматтар берилди.

Мындан сырткары алардын бүгүнкү студенттердин күнү менен милиция кызматкерлери куттукташып, окууларында ийгиликтердин болуусун каалашты.

Чет өлкөлөрдөн келип Жалал-Абад шаарындагы жогорку окуу жайларынан билим алып жаткан студенттер милиция кызматкерлерине ыраазычылык билдирип өтүштү. Алар мындай жолугушуулар оң пайдасын берээрин жана бир топ маалыматтарга ээ болушкандыгын белгилешти. Ошондой эле чет өлкөлүк студенттер мыйзам бузууларга барбай тургандыгын, тартипти бекем сакташаарын айтышты.