798 Бардыгы /

ЖАЛАЛ-АБАД. Жалал-Абад ШИИБдин Балдар иштери боюнча инспекциясынын  кызматкерлери прокуратура, социалдык адистер менен биргеликте милициянын көчмө кабылдама унаасында машина базарга барышты.

Жалал-Абад ОИИБдин басма сөз кызматы билдиргендей,

 «Эмгек жана өспүрүм» аталышындагы рейддин алкагында сабак учурунда мектепке барбай, автоунаа жууган, машина базардын ичинде соода-сатык менен алектенген, автоунаалардын маалыматы камтылган кагаздарды саткандар текшерилди. Рейддин жүрүшүндө 21 бала мектепке барбай машина базарда иштеп жүргөндүгү аныкталып, мектеп директорлоруна сунуштар жөнөтүлдү. Алардын ата-энелери чакыртылып, балдарын сабактан калтырбоо керектиги эскертилип, түшүндүрүү иштери жүргүзүлдү. Аныкталган өспүрүмдөрдүн ичинен 7 окуучу Сузак районунан келишкендиги такталды.

Эске салсак Кыргыз Республикасынын Президенти Садыр Жапаров мектепке тартылбай жүргөн балдарды аныктоо жана алардын ата-энелерине чара көрүү боюнча Жарлыкка кол койгон. Бул Жарлыктын талаптарын аткаруу максатында милиция тарабынан тиешелүү иштер жүргүзүлүүдө. Балдардын оор жумушка тартылуусу жана билим алуусун көзөмөлгө албагандыгы үчүн ата-энелерге Кыргыз Республикасынын Укук бузуулар жөнүндө кодексинин 102-беренесинин (Ата-энелик милдеттерден качуу) негизинде айып пул салынат.