1,524 Бардыгы /

Учурда өлкө аймагында зордук-зомбулуктун алдын алууга багытталган 16 күндүк компания жүрүп жатат. Акция 10-декабрь – Адам укуктарын коргоо күнүнө чейин созулат.

Ал компания аялдарга жана кыздарга карата зордук-зомбулуктун алдын алуу жана жоюу боюнча түшүндүрүү иштерин жүргүзүү жана чакыруу максатын көздөйт.

Бул компаниянын алкагында Б.Кыдыкеева атындагы жаш көрүүчүлөр театры тарабынан Ош жана Жалал-Абад шаарларында «Аялдар баш калкалоочу жай» спектакли коюлду. Көрсөтүү «Жигердүү жарандар» долбоорунун колдоосу менен кѳрсѳтүлгөн.

Спектаклде зордук-зомбулуктан качып кутулган сегиз аялдын чакан гана баш калкалоочу жайдын бир күнүндөгү окуялары көрсөтүлөт. Бул күнү көп нерселер болот. Апасы менен баш калкалоочу жайда жашаган жаш кыз атасына качат. Жашоосун таза барак менен баштоого аракет кылган дагы бир келин жумуш берүүчүлөргө алданып калат. Дагы бир кыз үй-бүлөсүнүн ырайымсыз салтынын курмандыгы болот.

 «Театр сахнасынан аялдарга карата зордук-зомбулук маселесин көтөргөн спектакль жаратуу зарылдыгына ынандык. Бул сахналаштыруу азап-кайгыны гана эмес аялдардын күрөшүн, үмүтүн, күчүн, тилектештигин чагылдырат. Аялдар оор кырдаалда жалгыз эмес экенин сезиши керек. Жаштар театры бул спектаклди театрдын туруктуу репертуарына киргизди», – дейт спектаклдин режиссеру Эльвира Ибрагимова.

Жалал-Абадда коюлган спектаклге эки жүзгө чукул көрүүчү келди. Көрсөтүү аяктагандан кийин актрисалар менен залдагылардын ортосунда суроо-жооп болуп, талкуу жүрдү. Натыйжада көрүүчүлөрдүн көпчүгү спектакль таасирдүү болгонун белгилешти.

“Чындыгында таасирдүү спектакль болду. Учурда кыз-келиндерди зомбулуктан коргоо негизги маселе болуп калды. А бирок аялдарды гана өзүн коргоого үндөбөй, бүт коомчукка зомбулук кылбаш керектигин жеткирүү зарыл. Зомбулуктун артынан канча адамдар жапа чегип, ар кандай курмандыктарга барып жатышат. Анын кесепетин элге көрсөтүү керек”, – деди Азема Балтабаева.

“Бул аялдар гана эмес, эркек кишилер дагы көрө турган спектакл болду. Зомбулукка каршы багыт алганда биз туура эмес иштеп жатабызбы деп ойлойм. Спектаклдин аталышында дагы “Аялдар баш калкалоочу жай” деп жалаң аялзаты келе турган кылып, өзүбүз чектеп коёбуз. Бирок эркек кишилер дагы келип көрүп, рекакция кылышы үчүн башынан аталашын, багытын башкача коюш керекпи деп ойлойм”, – деди Альмазбек Дүйшөбаев.

16 күндүк өнөктүк жыл сайын өтүп туруучу эл аралык компания болуп эсептелет. Ал 25-ноябрь – Аялдарга карата зомбулукту жоюунун эл аралык күнүндѳ башталган.

Акылай КАРАБАЕВА