816 Бардыгы /

          БАТКЕН. Кыргызстандын Улуттук банкы Тажикстандын куралдуу кол салуусунан жапа чегишкен Баткен жана Ош облустарындагы карыз алуучуларга көмөк көрсөтүү боюнча көрүлүп жаткан чаралар жөнүндө өзүнчө маалымат жасады.

          Кыргызстандын Улуттук Банкынан маалымдашкандай, үстүбүздөгү жылдын 1-декабрына карата аталган облустарда жабыркаган 474 карыз алуучу каржылык-кредиттик уюмдарга кайрылган. Булардын арасынан 19 миллион 974 миң сом суммасында 298 насыя жоюлган. Ал эми 38 миллион 430 миң сомдук 170 насыя реструктуризацияланган. Ушул тапта каржылык-кредиттик уюмдар бул аймактарда жабыркаган насыя алуучулардын бардык арыздарын кароону дагыле улантууда.

          Эскерте кетчү жагдай: үстүбүздөгү жылдын 14-17-сентябрында Тажикстан куралдуу агрессия көрсөтүп, мурда сүйлөшүлгөн бардык макулдашууларга карабастан, Кыргыз-Тажик мамлекеттик чек арасынын бардык периметри боюнча, тактап айтканда, Баткен облусундагы жана Ош облусунун Чоң-Алай районундагы чек аралык жана жарандык обьекттерге чабуул жасаган. Мунун кесепетинен 140 миңге жакын кыргызстандык чек арага жакын калктуу конуштардан дароо коопсуз жайларга эвакуацияланган. Куралдуу кагылышуунун айынан Баткен облусунун аймагында 600дөн ашуун турак жай жабыркаган. Ал эми Саламаттык сактоо министрлигинин маалыматына караганда, куралдуу кагылыштан 63 кыргызстандык (аскер кызматкерлери жана жай тургундар) шейит болуп, 198 киши жапа чегишкен.

Алишер ТОКСОНБАЕВ, өз кабарчы