1,104 Бардыгы /

ОШ. Жыл сайын 15-февралды Советтик жоокерлердин Ооганстандан чыгарылган күнү жана анда курман болгондорду эскерүү, ошондой эле Ооган ардагерлерине сый-урмат көрсөтүү күнү сыёары белгилеп келатабыз.

          Ошентип, мындан  туптуура 34 жыл илгери СССРдин Куралдуу Күчтөрүнүн Түркстан аскердик округунун 40-армиясынын башчысы, генерал-лейтенант Борис Громовдун “Термез” чек ара бекетинде: “Менин артымда бир дагы Советтик жоокер, офицер, прапорщик жок. Бул жерде болгон тогуз жылдык согуш аяктады”, – деп айткан сөзү эмдигиче эсибизде. Баса, дээрлик он жылга жакын созулган согушта интернационалист-жоокерлердин арасында миңдеген кыргызстандыктар дагы баатырларча болушкан.  Алар аскердик антка бекем турушуп, Оган согушунда эбегейсиз эрдик, эстен чыккыс баатырдык менен салгылашып, эң мыкты касиеттерин – мекенчилдигин, антка-шертке туруктуулугун, тайманбастыгын таасын көрсөтүшкөн.

          Баса, Ооган согушуна 7 миңден ашуун кыргызстандык жоокер катышкан. Алардын 300гө жакыны өлүмгө тике карап, согуш талаасында баатырларча курман болушкан. Ал эми 1500 жоокер жараланып, 4 жоокердин дайыны чыкпай калды. Албетте, бул сандар жөнөкөй сандар эмес, ар бир сан ар бир жоокердин – ар бир мекендешибиздин тагдыры! Биз муну эч качан унутпоого тийишпиз! Майдан талаасында көрсөткөн эрдиги үчүн 247 мекендешибиз СССРдин мамлекеттик жогорку сыйлыктары менен сыйланган. Биздин жердештерибиз – кенже сержант Юрий Исламов менен капитан Сергей Гущин Советтер Союзунун Баатыры наамына татышкан.

          Кыргызстандын Түштүк башкалаасында дагы Советтик жоокерлердин Ооганстандан чыгарылган күнү эскерилип, бул апатта курман болгондорго арналып атайын куран окулду. Акырында Ооган ардагерлерине арналып орнотулган эстеликке гүлчамбарлар коюлду. Маркумдардын урматына аскердик салют дагы атылды.

          Алишер ТОКСОНБАЕВ, өз кабарчы