1,158 Бардыгы /

ЖАЛАЛ-АБАД. Бүгүн 31-мартта Жалал-Абад ОИИБдин демилгеси менен уюштурулган “Балдар биздин келечегибиз, кылмыштуулукка жол жок!” аталышындагы форум болуп өттү.

Жалал-Абад ОИИБдин басма сөз кызматы билдиргендей, форумга Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, Жалал-Абад облусунун прокурору Турусбек Ишеналиев, ИИМдин ардактуу генералы Шеркозижан Мирзакаримов, Жалал-Абад ОИИБдин начальниги Жеӊишбек Абитов, Жалал-Абад ОИИБдин Ардагерлер кеӊешинин төрагасы Капарбек Исаков, Жалал-Абад облусунун мусулмандар казыятынын казысы Нематулла ажы Жээнбеков, Жалал-Абад облустук билим берүү усулдук борборунун башчысы Акылбек Токтосунов, Жалал-Абад шаарынын Курманбек аймактык башкаруунун башчысы коомдук алдын алуу борборунун төрайымы Бактыгүл Алдозова, Жалал-Абад жаштар коомунун төрагасы Алмазбек Дүйшөбаев, шаардык жана райондук ички иштер бөлүмдөрүнүн начальниктери, мэрлер, акимдер жана алардын орун басарлары, коомдук алдын алуу борборлорунун мүчөлөрү катышышты.

Форумдун башталышында жаш өспүрүмдөр кылмыштуулуктун алдын алууга багытталган лозунгдарды көтөрүп, жөө жүрүштөн өтүштү. Андан соӊ Жалал-Абад шаарынын борбордук аянтына тизилген облус аймагындагы милициянын көчмө кабылдама унааларынын ишмердүүлүгү боюнча форумдун катышуучуларына маалыматтар берилди. Ошондой эле иш-чаранын башталышында маалымат баракчалары, бейджик, төш белги сыяктуу форумдун логотиби түшүрүлгөн буюмдар катышуучуларга берилип, сыртта стенддер коюлуп, милициянын ишмердүүлүгү видеороликте көрсөтүлдү.

Форумдун жүрүшүндө Абсаттар Сыргабаев сөз сүйлөп, кылмыш же укук бузуулар жасалган соӊ чара көрбөй, терс көрүнүштөрдүн алдын алуу керектигин баса белгиледи.

Турусбек Ишеналиев коомчулукта орун алып жаткан жат көрүнүштөр тууралуу баяндап, алардын мыйзамдарда көрсөтүлгөн жоопкерчиликтерине токтолду.

Шеркозижан Мирзакаримов облус аймагына кирип келген ар бир чоочун адамды көзөмөлгө алып, жаш өспүрүмдөргө татыктуу тарбия берүү керектигин белгиледи.

Нематулла ажы Жээнбеков коомчулукта агартуу иштерин жүргүзүп, кесипкөй адистерди даярдап, келчек муундарга туура багыт көрсөтүү зарылдыгын айтып өттү.

Президиумдун мүчөлөрү кылмыштуулуктун алдын алууда биргелишип иштөө зарылдыгын белгилешип, коомдук алдын алуу борборлорунун, милициянын көчмө кабылдама унааларынын ишмердүүлүгү боюнча бир топ маалыматтарды беришти. Ошондой эле форумга байланыштуу уюштурулган иш-аракеттер жогорку деӊгээлде болгондугун белгилешти.

Президиумдун бардык мүчөлөрүнөн кийин Жалал-Абад ОИИБдин начальниги Жеӊишбек Абитов сөз сүйлөп,  коомдук алдын алуу борборлорунун ишмердүүлүгүнө жергиликтүү бийлик өкүлдөрү каржылык колдоо көрсөтө тургандыгы мыйзамдарда жазылгандыгын айтып өттү. Ошондой эле облус аймагынан келген бардык катышуучуларга ыраазычылык билдирип, кылмыштуулуктун алдын алууда биргелешип иштөөгө чакырды.

Андан соӊ Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев форумда айтылган сөздөр кагаз бетинде калбай, ар бир район-шаарларда ишке ашышы керектигин белгиледи.

Форум бир катар суроо жана сунуштар менен улантылып, талкуулар жүрдү. Соӊунда форумга активдүү катышкандарга Жалал-Абад ОИИБдин ардак грамоталары тапшырылды.

Форумдун жыйынтыгында кылмыштуулуктун, зордук-зомбулуктардын, алдын алууга багытталган мыйзамдардын иштөөсүн күчөтүү, коомдук алдын алуу борборлорунун ишмердүүлүгүн ар тараптуу колдоо, аларды материалдык жактан жергиликтүү бюджеттен каржылоо, милициянын участкалык инспекторлору жана балдар менен иштөө инспекциясынын кызматкерлерине кызматтык бөлмөлөр жана кошумча каражаттарды кароо боюнча меморандум кабыл алынды.