765 Бардыгы /

БИШКЕК. Министрлер кабинетинин төрагасынын орун басары Эдил Байсалов Бишкектеги №1 гимназия-интернатында нааразылык акциясын өткөргөн бардык мугалимдер жумуштан алынганын билдирди. Бул тууралуу анын видеосу 18-апрелде “Говори ТВнын” Ютуб каналына жарыяланды.

Ал “окуучуларды митингге катыштырып, козголоң уюштурган мугалимдер боюнча укук коргоо органдары да иш алып барарын” билдирди.

“Алар кечээ күнү толугу менен жумуштан алынды. Биз буга чейин аларды башка мектептерге бөлүштүрүп, жумуш менен камсыз кылалы деп ойлонуп жатканбыз. Жаңы мугалимдердин жамаатынын балдарга эч кандай зыяны тийбейт. Мектеп ошол бойдон калат”, – деди Байсалов.

Бул маалыматты Бишкек шаардык билим берүү башкармалыгынын башчысы Айнура Арстамбекова ырастап, алардын ордуна жаңы мугалимдер алынганын, окутуу программага ылайык толук жүрүп жатканын айтты.

“Митингге чейин эле айрым мугалимдер өз каалоосу менен арыз жазып кетишкен. Нааразылык уюштуруп, пикетке чыккандар кийин жумуштан алынды. Алар жалпысынан 40тай мугалим”, – деди Арстамбекова.

17-апрелде социалдык тармактарга Бишкектеги №1 мектеп-интернаттын имаратынын алдында мугалимдер менен окуучулардын митингге чыкканы тартылган видео тараган. Анда митингге чыккандар мектептин мурдагы жетекчисин кызматта калтырууну талап кылып, “Кетпесин!” деп кыйкырып жатканын көрүүгө болот.

15-апрелде ушул эле мектеп-интернаттын эмгек жамааты өлкө бийлигине кайрылуу жолдоп, Бишкек шаардык билим берүү башкармалыгы аларды жумуштан күч менен кетирип жатканын айтышкан.

Бул окуя боюнча Бишкек шаардык мэриясы 17-апрелде билдирүү таратып, аталган мектепти Тоголок Молдо атындагы 71-гимназия-интернатына кошуу боюнча чечим чыкканын билдирген.

Ошондой эле буга чейин мектептин эмгек жамаатынан, Бишкек шаардык прокуратурасынан жана шаардык кеңештин депутаттарынан кайрылуу түшүп, анын негизинде мекемелер аралык комиссия түзүлгөнү айтылат. Комиссия мектептин ишин текшерген учурда одоно мыйзам бузуулар аныкталган.

Министрлер кабинетинин төрагасы Акылбек Жапаров 18-апрелде билим берүү тармагындагы айрым маселелерге байланыштуу жыйын өткөрүп, анда Бишкектеги №1 интернат-гимназиядагы талаш-талкуу жараткан окуяларды сынга алган. Ал мектеп окуучуларын чыр-чатактарга тартууга жана колдонууга жол берилбесин да белгилеген.

WWW.