1,236 Бардыгы /

          ЖАЛАЛ-АБАД. Жер тилкелери боюнча жемкорлук схеманы уюштурууга шектелип, Сузак районундагы Сузак айыл өкмөтүнүн мурунку башчысы С.А.Н кармалды. Бул туурасында УКМКнын басма сөз кызматынан билдиришти.

Маалыматка караганда, Сузак раонундагы Сузак айыл өкмөтүнүн мурунку башчысы С.А.Н кол алдындагы кызматкерлери жана Сузак райондук «Кадастр» жана архитектура башкармалыгынын жооптуу өкүлдөрү менен чогуу-чараан кылмыштуу иш жасашып, жеке турак жай куру максатында жер тилкелерин мыйзамсыз бөлүп берүү боюнча жемкорлук схеманын уюштуруучусу экендиги аныкталды. Анткени, Сузак районунун «Сузак», «Каркыра-Мисте» жана «Благовещенка» айылдарынын калкка кезексиз жана акысыз берилчү 100 бирдиктен ашык жер тилкелери С.А.Н. буйругу менен жарандарга жасалма документтердин негизинде ар бир жер тилкеси 100 миң сомдон 200 миң сомго чейин акча каражатына сатылып турган. Соодаланган жер тилкелерине жасалма каттоо маалыматтары менен жасалма укук белгилөөчү документтер берилип, андан соң «Кадастр» мамлекеттик ишканасы жергиликтүү органы тарабынан жеке менчик укугу тууралуу мамлекеттик актылар, райондук архитектура органдары тарабынан курулушка уруксат берилген.

Ошентип, дыкаат жүргүзүлгөн баалоо экспертизасынын жыйынтыгында мыйзамсыз берилген жер тилкелеринин баасы 93 857 700 сом экени аныкталды. Ушул тапта прокуратура органдары менен биргеликте аларды жергиликтүү өз алдынча башкаруу органдарынын балансына кайтаруу чаралары көрүлүүдө. Буга дейре Сузак айыл өкмөтүнүн, ошондой эле Сузак райондук кадастр жана архитектура башкармалыгынын 9 кызматкери жогоруда аталган жоруктарга активдүү катышкандыгы үчүн кылмыш жоопкерчилигине тартылып, убактылуу кармоочу жайга киргизилген.

УКМКнын Жалал-Абад облусу боюнча башкы башкармалыгы тарабынан жер тилкелери боюнча ушул өңдөнгөн жаңы жагдайларды аныктоо туралуу облустун аймагында тергөө амалдары ырааттуу улантылууда.

Алишер ТОКСОНБАЕВ, өз кабарчы