1,203 Бардыгы /

          ОШ. Бүгүн Ош шаарында «Чернобыль курмандыктары» эстелигинин алдында Чернобыль АЭСиндеги кырсыктын кесепетинен курман болгондорго жана жапа чекендерге арналган эскерүү иш-чарасы өткөрүлдү. Иш-чарага Ош шаарынын вице-мэри Сонунбек Жунусбаев, президенттин Ош облусундагы ыйгарым укуктуу өкүлүнүн аппаратынын уюштуруу инспектордук бөлүмүнүн башчысы Исакбек Качыбеков, Ош шаардык Кеңешинин депутаты Болот Баетов, Чернобыль апаатынын катышуучулары, каза тапкандардын жакындары катышышты.

          Ош шаарынын вице-мэри Сонунбек Жунусбаев Ош шаарынын жетекчиси Бакытбек Жетигеновдун атынан апаатта каза тапкандардын жакындарына терең кайгыруу менен көңүл айтып, катышуучулар менен алардын үй-бүлөлөрү мэрия тарабынан дайыма колдоого алынаарын, жасалган эрдиктер эч качан унутулбай тургандыгын баса белгиледи. Кырсык катталары менен Ош шаардык аскер комиссариатынын демилгеси аркасында апааттын кеспеттерин жоюу үчүн ыктыярчылардын ыкчам тобу уюштурулган. Бүгүнкү күндө Ош шаарында Чернобылдагы кырсыкты жоюуга катышкан 33 адам жашайт. Көпчүлүгү радиациядан олуттуу жапа чегишкен. Ал эми апаатта каза тапкандар бир мүнөт унчукпай туруу менен эскерилип, куран окулуп, а түгүл гүл чамбарлар дагы коюлду.

          Белгилей кетчү жагдай: Украинадагы Чернобыль атом бекетиндеги ири жарылуу 1986-жылдын 26-апрелинде жүз берген. Мунун кесепетин жоюу үчүн Ош шаарынан жалпысынан 114 адам катышкан. Жарылуунун кесепетинен уулуу реактивдүү зат аба аркылуу постсоветтик кошуна үч өлкөнүн аймагына жана Европанын бир бөлүгүнө дагы тараган. Уулуу заттан жүз миңдеген адамдар жабыркашып, миңдеген куткаруучулар дартка чалдыгышып, а түгүл майып кейпин кийишкен.

Алишер ТОКСОНБАЕВ, өз кабарчы