951 Бардыгы /

ЖАЛАЛ-АБАД. 1-июнь – Балдарды коргоо күнүнө карата Жалал-Абад шаардык ички иштер бөлүмү тарабынан Жалал-Абаддын символу болгон «Курманбек» баатырдын эстелигинин алдында «Бүгүнкү күн балдары, эртеӊки мекен сакчысы!» аталышындагы майрамдык иш-чара өткөрүлдү.

Жалал-Абад ОИИБдин басма сөз кызматы билдиргендей, балдарга арналган салтанатка Жалал-Абад ОИИБдин Коомдук коопсуздук кызматынын башчысы Алмазбек Жусупов, «Ариет» балдар чыгармачылык борборунун директору Жыпара Аманкулова жана борбордун тарбиялануучулары катышышты.

Иш-чарада Жалал-Абад ШИИБдин Балдар иштери боюнча инспекциясы тарабынан даярдалган боёк менен колго тартылган Кыргызстандын картасын ОИИБдин Кайгуул-күзөт кызматынын жана ИИМдин ички аскерлеринин 7704 аскер бөлүгүнүн кызматкерлери көтөрүп турушту. Кыргызстандын картасынын алдында «Ариет» балдар чыгармачылык борборунун балдары ИИМдин ички аскерлеринин 7704 аскер бөлүгүнүн оркестринин коштоосунда өз өнөрлөрүн тартуулашты.

Андан соӊ иш-чарага катышкан жаш өспүрүмдөргө балмуздак жана шириндиктер таратылды. Милиция кызматкерлери негизги максат жаш балдарды патриоттуулукка тарбиялап, мекен үчүн кызмат кылууга чакыруу жана балдарга бактылуу балалык тартуулап, майрамга карата көӊүл буруу экендигин белгилешти.