АПТА ИЧИНДЕ ЖАҢЫ КЫЗМАТ КИМДЕР КЕЛДИ?

1,209 Бардыгы /

Кыргызстанда ушул жылдын 29-майынан 3-июнуна чейин бир катар кадрдык өзгөрүүлөр болду. Reporter.kg апта ичинде кызматка дайындалган жана кызматынан алынган жетекчилерди тизмектеди.

Улан Чаначев эмгек, социалдык камсыздоо жана миграция министринин санариптик өнүктүрүү боюнча орун басары болуп дайындалды. Тескемеге министрлер кабинетинин төрагасы Акылбек Жапаров кол койду. Буга чейин Улан Чаначев Эмгек, социалдык коргоо жана миграция министрлигинин санариптик өнүктүрүү жана сатып алуулар башкармалыгынын башчысы болуп иштеген.

Алтынбек Жумаев Кыргызстандын Малайзиядагы атайын жана ыйгарым укуктуу элчиси болуп дайындалды. Буга чейин Азимбек Бекназаров өткөн жылдын августуна чейин Кыргызстандын Малайзиядагы элчиси болгон. Алтынбек Жумаев 2022-жылдын декабрында мамлекет башчынын кеңешчиси кызматынан бошотулган, ага чейин президенттик аппараттын маалыматтык саясат кызматын жетектеп келген.

Айнура Мурзатаева Каржы рыногун жөнгө салуу жана көзөмөлдөө кызматынын төрагасынын орун басары болуп дайындалды. Айнура Мурзатаева – Жусуп Баласагын атындагы улуттук университеттин экономика факультетинин финансы кафедрасынын доценти.

Рахат Мусаева Биринчи Май районунун акиминин орун басары болуп дайындалды. Ал өткөн аптада Билим берүү жана илим министринин орун басары болуп кеткен Аида Рысбаеванын ордуна социалдык маселелер боюнча акимдин орун басары болду.Буга чейин Рахат Мусаева Биринчи Май районунун облустук билим берүү борборун жетектеп келген.

ИИМдин ЖКККББнын башчысынын орун басары болуп Манасбек Сыдыгалиев дайындалды. ЖКККББнын кызматтарын чыңдоо максатында Ички иштер министрлигинин буйругу менен милициянын полковниги Байыш Ашырбеков ИИМдин Жол кыймылынын коопсуздугун камсыздоо башкы башкармалыгынын башчысынын орун басары кызматынан “Укук коргоо органдарында кызмат өтөө жөнүндө” мыйзамына ылайык запаска (аскердик эсепке коюу менен) бошотулду.

Ал эми милициянын подполковниги Манасбек Сыдыгалиев ИИМдин Жол кыймылынын коопсуздугун камсыздоо башкы башкармалыгынын жол кайгуул кызматы жана укук колдонуу практикасы башкармалыгынын башчысы кызматынан бошотулуп, ошол эле башкы башкармалыктын башчысынын орун басары кызматына дайындалды.