768 Бардыгы /

          КЫРГЫЗСТАН. Акыркы сааттарда Казакстандын аймагында Кыргызстанга чыгуу тарапта жүк ташуучу транспорттордун топтолуусу катталды. Бул туурасында Кыргыз Республикасынын  УКМКсынын Мамлекеттик Чек ара кызматынын маалымат жана коммуникация башкармалыгынан билдиришти.

          Алдын ала маалыматтарга караганда, “Ак-Тилек-автожол”, “Чоң-Капка-автожол”, “Чалдыбар-автожол” жана “Ак-Жол-автожол”  көзөмөл-өткөрүү жайларында белгисиз себептерден улам Кыргыз Республикасынын Каржы министрлигинин алдындагы Мамлекеттик салык кызматынын “Жыйынды посту”  автоматттык  маалыматтык тутумунун “АМТ” ишинде мүчүлүштүктөр катталган. Эскерте кетчү жагдай: ЕАЭБнин мүчөлөрү болгон өлкөлөрдөн республиканын аймагына киргизилчү товарларды эсепке алуу үчүн Мамлекеттик салык кызматы “Жыйынды пост” автоматтык маалыматтык тутумун (АМТ)  туруктуу колдонот.  Ошондуктан, АМТ ишинде мүчүлүштүктөр болгондугуна байланыштуу Казакстандын аймагында Кыргызстанга чыгуу тарапта жүк ташуучу транспорт каражаттарынын топтолуусу катталган.

          Белгилей кетчү жагдай: Кыргыз Республикасынын УКМКсынын мамлекеттик Чек ара кызматынын Тышкы миграцияны эсепке алуу бирдиктүү тутуму ушул тапта штаттык режимде гана иштеп жатат. Айдоочулар жана жүк ташуучулар арасында түшүндүрүү иштери тынымсыз жүргүзүлүүдө.

Алишер ТОКСОНБАЕВ, өз кабарчы