606 Бардыгы /

ПРЕЗИДЕНТ САДЫР ЖАПАРОВ УКМКнын ОШ ШААРЫ ЖАНА ОШ ОБЛУСУ БОЮНЧА БАШКЫ БАШКАРМАЛЫГЫНЫН ЖАҢЫ ИМАРАТЫНЫН АЧЫЛЫШЫНА КАТЫШТЫ

          ОШ. Президент Садыр Жапаров Ош шаарына жана Ош облусуна жасаган жумушчу сапарынын алкагында Улуттук коопсуздук мамлекеттик комитетинин (УКМК) Ош шаары жана Ош облусу боюнча башкы башкармалыгынын жаңы имаратынын ачылышына катышты.

          Мамлекет башчысы Садыр Жапаров өз сөзүндө Улуттук коопсуздук органдарынын кызматкерлеринин, тактап айтканда УКМКнын Ош шаары жана Ош облусу боюнча башкармалыктарынын өлкө тарыхындагы олуттуу ролун баса белгиледи. Президент Совет мезгилинен бүгүнкү күнгө чейинки маанилүү окуяларга өзгөчө токтолуп, алардын республикадагы туруктуулукту сактоодогу иштерине кеңири баяндама жасады. Ушуга улай  Садыр Жапаров бүгүнкү күнү дүйнө жүзүндө оор кырдаал күчөп, анын кесепеттери мамлекеттер үчүн, анын ичинде улуттук коопсуздук маселелеринде жаңы чакырыктарды жана коркунучтарды жараткандыгын бөлүп айтты. Президент буга байланыштуу тармактык органдардын кызматкерлерине карата талаптар да өсүп жатканын, алардын иши саясий жана эл аралык туруктуулукту камсыз кылуу, терроризмге жана коррупцияга каршы күрөшүү, аймактык бүтүндүктү сактоо жана бул багыттагы иш-чараларды күчөтүү боюнча милдеттер менен көбөйгөнүн белгиледи. Мамлекет башчысы баардык бул маселелерге өлкө жетекчилиги тарабынан комплекстүү көңүл бурулуп жаткандыгын баса белгиледи.

          Улуттук коопсуздук органдарынын материалдык-техникалык базасы тууралуу айтып жатып, Садыр Жапаров УКМКнын Ош шаары жана Ош облусу боюнча башкармалыгынын эски имараты 1979-жылы курулуп, анда мезгил-мезгили менен пландуу оңдоп-түзөө иштери жүргүзүлүп келгендигин баса белгиледи. Башкармалыктын кызматкерлеринин ишине заманга ылайык шарттарды түзүп берүү максатында өткөн жылы 2836 чарчы метрди түзгөн 3 жаңы имарат курулуп баштаган. Бүгүнкү күндө обөекттердин курулушу аяктап, ичинде заманбап спорт комплекси жана жаңы тергөө абагы менен пайдаланууга тапшщырылып жатат. Мамлекет башчысы жаңыланган шарттар регионалдык башкармалыктын кызматкерлерине жаңы дем-күч берип, алардын ишинин натыйжалуулугун жогорулатууга өбөлгө болот деген бекем ишенимин дагы ачык билдирди.

          Президент Садыр Жапаров сөзүнүн аягында улуттук коопсуздук органдарынын кызматкерлерине кажыбас кайрат, бекем эрк, мекенчилдик жана жооптуу кызматында ийгиликтерди каалады.
Сөз сүйлөгөндөн кийин мамлекет башчысы жаңы обьекттердеги кызматтык жайларды карап чыгып, жаңыланган шарттарды көрүп, башкармалыктын аймагын бир сыйра кыдырып чыкты.

Алишер ТОКСОНБАЕВ, өз кабарчы