828 Бардыгы /

ПУШКИН КӨЧӨСҮНӨ ЖАҢЫДАН АСФАЛЬТ ТӨШӨЛҮП, ПАЙДАЛАНУУГА БЕРИЛДИ

ЖАЛАЛ-АБАД. Бүгүн, 9-август күнү Жалал-Абад шаарында узундугу дээрлик эки чакырымды, кеңдиги 20 метрди түзгөн Пушкин көчөсүнө жаңыдан асфальт төшөлүп, пайдаланууга берилди.

 Жолдун ачылуу аземине Министрлер Кабинетинин төрагасынын орун басары – УКМКнын төрагасы Камчыбек Ташиев, Президенттин Жалал-Абад облусундагы өкүлү Абсаттар Сыргабаев, Жалал-Абад шаарынын мэри Эрнисбек Ормоков баштаган жергиликтүү бийлик өкүлдөрү, калаа тургундары катышты. 

 Аталган көчө Жалал-Абад шаарын өнүктүрүүгө бөлүнгөн 2 млрд. сомдун эсебинен каржыланып, 70 млн. сом акча каражат жумшалды.

 Кошумчалай кетсек, Пушкин көчөсү – Жалал-Абад шаарынын негизги жолдорунун бири. Аталган көчө 2018-2019-жылдары кеңейтилип, бирок кеңейтилген бөлүгүнө гана убактылуу асфальт басылган болчу.

Белгилей кетсек, 2023-жылы Жалал-Абад шаарында жалпы 13 чакырым тротуарга жана 20 чакырым жолго асфальт төшөө пландалган. Мындан сырткары шаардан “Жалал-Абад” санаториясына чейин веложол курулат.