534 Бардыгы /

          ЖАЛАЛ-АБАД. Жалал-Абад облусуна караштуу Майлуу-Суу шаарынын кышка даярдык иштерине 2,7 миллион сом жумшалды. Бул тууралуу президенттин Жалал-Абад облусундагы өкүлчүлүгүнөн билдиришти.

          Маалыматка караганда, бүгүнкү күнгө карата № 3- отканага жаңы суу куурларын орнотуу, «Артезиан» суусун тартып келүү иштери аткарылды. Ушул тапта тартылып келген суу куурларга кое берилип, аларды дыкаат текшерүү иштери жүргүзүлүүдө. Капиталдык оңдоп-түзөөдөн өткөрүү иштери үстүбүздөгү жылдын сентябрына чейин бүткөрүлөт. Белгилей кетчү жагдай: Майлуу-Суу шаарындагы№ 3 отканага куурларды орнотуу, суу жеткирүү иштерине 2,7 млн сом мамлекеттик бюджеттен жумшалды.

          Эскерте кетээрибиз: Үстүбүздөгү жылдын 13-январында аба ырайынын ызгаардуу суугунун кесепетинен Майлуу-Суу шаардык суу менен камсыздоо ишканасынын суу куурлары тоңуп, шаар суусуз, жарыксыз жана жылуулуксуз калган. Мындан улам шаарга «Өзгөчө кырдаал» режими киргизилип, кийин калыбына келтирилген эле.

Алишер ТОКСОНБАЕВ, өз кабарчы