729 Бардыгы /

          БАТКЕН. Баткен облусунун борбору Баткен шаарында Жаратылыш ресурстары, экология жана техникалык көзөмөл министрлигинин Баткен аймактык башкармалыгынын жаңы кеңсеси ачылып, акыры пайдаланууга тапшырылды. Президенттин облустагы ыйгарым укуктуу өкүлүнүн басма сөз кызматынан билдиришкендей, ишкана мындан 23 жыл мурда, тактап айткандай, 2000-жылы түзүлгөн.

          Өткөн жылдар аралыгында имаратынын биротоло эскилиги жетип, авариялык абалга кептелгендиктен, жапжаңы имарат куруу зарылчылыгы жаралган эле. Жаңы жана заманбап имаратты куруу үчүн мамлекеттик бюджеттен 40 миллион сом сарпталды. Мекеменин имаратынын ачылышына министрлер кабинетинин төрагасынын орун басары Эдил Байсалов, президенттин Баткен облусундагы ыйгарым укуктуу өкүлү Абдыкарим Алимбаев, жаратылыш ресурстары, экология жана техникалык көзөмөл министри Мелис Турганбаев жана жергиликтүү жетекчилер жана аталган мекеменин кызматкерлери катышышты.

          – Жаркыраган бул имаратта мыкты иштөө үчүн бардык шарттар жаратылды. Акыркы мезгилде климаттын абдан ыкчам өзгөрүүсүнө байланыштуу жаратылышты коргоо дүйнөлүк деңгээлдеги маанилүү маселе экендигин эске тутуп, Баткен облусунун экологдору, жаратылышты жана башкармалыктын карамагындагы жаратылыш сейил бактары, корук жана жаратылыш эстеликтерин көздүн карегиндей сактоо жана өнүктүрүү үстүндө жандуу аракеттерди көрөт деп ишенем! – деди президенттин Баткен облусундагы ыйгарым укуктуу өкүлү Абдыкарим Алимбаев.

        Баса, мындан ары мындай имараттар эми республикабыздын башка аймактарындагы дагы экологдорго жана жаратылышты коргоочуларга куруп берилээри айталды.

Алишер ТОКСОНБАЕВ, өз кабарчы