729 Бардыгы /

        ОШ. Ош шаардык медициналык «Тез жардам» борборунда мекемени санариптештирүү жана электрондук башкаруу тутумун ишке киргизүү жараяны толугу менен аяктады. Ушуга байланыштуу Ош шаарынын мэриясы, Саламаттыкты сактоо министрлиги, “GIZ” эл аралык уюмунун (Германиянын Эл аралык кызматташтык коому), Ош шаардык жана облустук медициналык мекеме-ишканаларынын өкүлдөрү тушоо кесүү аземин өткөрүштү.

          Иш-чаранын жүрүшүндө Ош шаарынын мэриясынын жардамы, “GIZ” Эл аралык уюмунун техникалык колдоосу менен “Тез жардам” борборунун электрондук башкаруу процессин өнүктүрүү үчүн аткарылган иш-аракеттер туурасында кеёири маалыматтар берилди. Электрондук башкаруу тутуму диспетчерлердин тез жардам тобу менен өз ара байланыштарын бекемдеп, чакыруу жөнөтүлгөндө алардын жайгашкан жерин тыкыр көзөмөлдөөгө мүмкүндүк жаратып, медициналык жардам көрсөтүүнүн ылдамдыгын жана сапатын дагы ого бетер жогорулатат. Ошондой эле кадрлардын уюштуруу иштерин, маалыматтык көзөмөлдү деле жакшыртат. Буга керектүү жабдууларды жана байланыш каражаттарын сатып алуу жана орнотуу менен катар медициналык кызматкерлер арасында санариптик сабатуулукту жогорулатуу максатында окутуулар дагы жүргүзүлгөн.

          Ошентип, Ош шаарынын мэриясы тарабынан «Керме-Тоо» жана «Манас-Ата» муниципалдык аймактарында ачылган «Тез жардам» борборунун көмөк чордондорунда дагы электрондук башкаруу тутуму толук кандуу менен ишке киргизилди. 2024-жылдын аягына дейре «GIZ» медициналык кызматкерлерди окутууга жана дагы тиешелүү кеңештерди берүүгө, ошондой эле электрондук тутумдун ишин жөнгө салууга колдоо көрсөтүүнү дагыле улантат.

          Алишер ТОКСОНБАЕВ, өз кабарчы