855 Бардыгы /

БИШКЕК. Октябрь айынын соңку күнүндө Бишкек шаарында WE CARE: Балдарга кам көрүү аркылуу аялдардын мүмкүнчүлүктөрүн кеңейтүүгө багытталган долбоордун расмий ачылышы тушоосун кести. 3 миллион АКШ доллар каражаты менен жүзөгө ашырыла турган бул долбоор  мектепке чейинки курактагы балдардын сапаттуу өнүгүү жана балдарды эрте куракта өнүктүрүү мекемелерди түзүү аркылуу ишкер аялдар үчүн экономикалык мүмкүнчүлүктөрдү түзүүгө гана багытталган.

WE CARE долбоору Кыргыз Республикасынын билим берүү жана илим министрлиги менен Ага Хан фондусунун кызматташуусунун негизинде  гана жүзөгө ашырылат. Кийинки үч жылдын аралагында аталган долбоор 100дөн ашык балдарды эрте куракта өнүктүрүү мекемелерине жардам көрсөтөт жана 700дөн ашык мугалимдерди жана тарбиячыларды дагы окутат.

Иш-чаранын ачылышында Кыргыз Республикасынын билим берүү жана илим министри Догдуркүл Кендирбаева долбоордун Кыргыз Республикасында мектепке чейинки билим берүүнү өнүктүрүүдө долбоордун маанилүүлүгүн белгиледи: – Билим берүү жана илим министрлиги балдарды эрте өнүктүрүүгө багытталган  программаларды колдогон баардык демилгелерди формасына карабай жеке менчикпи же мамлекеттикпи ар дайым кубаттайт жана колдоого алат!

АКШнын  Кыргыз Республикасындагы элчиси Лессли Вигери балдарга кам көрүү жана эрте билим берүүнүн маанилүүлүгүн баса белгилеп, аталган долбоордун ачылышы 29-октябрда белгиленүүчү биринчи Эл аралык камкордук жана колдоо күнүнө туура келип жаткандыгын баса белгиледи: – Бул өлкөдө АКШ Кыргызстандагы аялдардын жана балдардын көйгөйлөрүнө анча маани бербейт дегендер бар.  Ден-соолукка жана билимге көңүл бурган We CARE жана башка ушул сыяктуу программалар бул аргументтин канчалык жалган экенин көрсөтүп турат. Сапаттуу балдарга кам көрүү мүмкүнчүлүгү биздин келечекке салынган инвестиция болуп саналат. Америка Кошмо Штаттары гүлдөп-өскөн жана демократиялуу өнөктөштөрдү көргүсү келет.

Кыргыз Республикасындагы Ага Хан Фондунун башкы директору Давлатсултон Доргабекова  WE CARE долбоору Кыргыз өкмөтүнүн 2020-2040-жылдарга билим берүүнү өнүктүрүү стратегиясына кандай салым кошо тургандыгы тууралуу ой-пикири менен бөлүштү: – Бул долбоор аркылуу Кыргыз Республикасынын аялдары эрте жаштагы балдарды өнүктүрүү чөйрөсүндө туруктуу ишкер болуу мүмкүнчүлүгүнө ээ болоруна бекем ишенебиз, бул аларга экономикалык көз карандысыздыкка гана эмес, ошондой эле экономикалык өнүгүүгө олуттуу салым кошууга мүмкүндүк берет. Ошол эле учурда, бул долбоор Кыргыз Республикасында сапаттуу мектепке чейинки билим берүүнү колдоо менен балдардын жаркын келечегине кошкон салымы болуп саналат.

Баса, “WE CARE” долбоору келерки үч жыл аралыгында гана жүзөгө ашырылат жана балдардын эрте өнүгүүсүнө көмөктөшүүгө жана ушул тармакта кызматтарды жакшыртууга жана Кыргыз Республикасындагы ишкер аялдардын мүмкүнчүлүктөрүн кеңейтүүгө гана салым кошот. WE CARE долбоору жана анын келечектеги иш-чаралары тууралуу көбүрөөк маалымат алуу үчүн төмөнкү дарекке кайрылыңыз:  Жыпара Ташмаматова, Ага Хан Фондунун балдарды эрте куракта өнүктүрүү программасынын жетекчиси 0773 960 537.

Алишер ТОКСОНБАЕВ, өз кабарчы