786 Бардыгы /

ИИМдин делегациясы австриялык өнөктөштөр менен терең тажрыйба алмашууга багытталган Венага болгон иш сапарын ийгиликтүү аяктады.

ИИИдин басма сөз кызматы билдиргендей, “Saferworld” көз карандысыз эл аралык уюмунун жана “Эл аралык толеранттуулук үчүн” фондунун колдоосу менен өткөрүлгөн иш-чараларда милиция менен калктын социалдык өнөктөштүгү, кылмыштуулуктун алдын алуу жана коомдук коопсуздукту камсыздоо маселелери талкууланды.

Делегациянын курамына Кыргыз Республикасынын Ички иштер министринин орун басары, милициянын генерал-майору Октябрь Урмамбетов, ИИМдин Коомдук коопсуздук кызматынын бөлүм башчысы, милициянын полковниги Нуржан Адылова жана ички иштер органдарынын аймактык бөлүмдөрүнүн өкүлдөрү кирди.

Иш сапар Кыргызстан менен Австриянын ортосундагы биргелешкен коопсуздук жана кылмыштуулуктун алдын алуу жаатында билим жана тажрыйба алмашуу, социалдык өнөктөштүктү чыңдоо, милициянын ишмердүүлүгүндөгү ачыктыкты жана жоопкерчиликти жогорулатуу механизмдерин изилдөөгө багытталган.

Кыргыз делегациясы Австриянын ИИМдин Коомдук коопсуздук борборунун ишмердүүлүгү жана иш ыкмалары, Saferworld жана австриялык тараптын тематикалык презентациялары, ошондой эле Европа Биримдигинин укук бузуулардын алдын алуу тармагынын презентациясы менен таанышышты.

Австриялык кесиптештер коомчулуктун ишенимин арттыруу жана кызмат көрсөтүүнүн сапатын жогорулатуу боюнча тажрыйбасы менен бөлүшүп, укук коргоо органдарынын өкүлдөрү менен жарандардын расмий эмес байланышын камтыган “Полиция кызматкери менен кофе” долбоору тууралуу айтып беришти.

Ошондой эле кызматкерлерди окутуу жана даярдоо, укук коргоо тармагында заманбап технологияларды колдонуу, коомдук коопсуздукту камсыз кылууда жаңы ыкмаларды киргизүү маселелери талкууланды.

Бул иш сапар эл аралык кызматташтыкты тереңдетүүдөгү маанилүү кадам болду, тажрыйба алмашуу өлкөлөргө заманбап коркунучтарга натыйжалуу каршы турууга жана жарандарды коргоонун туруктуу системаларын түзүүгө мүмкүндүк берет.